'കലാലയങ്ങള്‍ക്കുള്ളിലെ എസ്.എഫ്.ഐ ഇടിമുറികള്‍ തകര്‍ക്കപ്പെടണം'
മലപ്പുറം: അക്ഷരക്ഷേത്രങ്ങളായ കലാലയങ്ങളിലെ ഇടിമുറികള്‍ തകര്‍ക്കുന്നവര്‍ തങ്ങളാണെന്ന് അവകാശപ്പെടുന്നവര്‍തന്നെ കാംപസുകളില്‍ ഇടിമുറികള്‍ സൃഷ്ടിക്കുകയാണെന്ന് എ.ഐ.എസ് .എഫ് ജില്ലാ സെക്രട്ടേറിയറ്റ്.
ഉത്തരേന്ത്യയില്‍ എ.ബി.വി.പി നടപ്പിലാക്കുന്ന ഫാസിസ്റ്റ് രീതിയാണ് കേരളത്തില്‍ പുരോഗമന വിദ്യാര്‍ഥി പ്രസ്ഥാനമെന്നു നടിക്കുന്ന എസ്.എഫ്.ഐ പിന്തുടരുന്നതെന്നും ഇതിനു തെളിവാണ് കഴിഞ്ഞ ദിവസങ്ങളില്‍ തിരുവനന്തപുരം യൂനിവേഴ്‌സിറ്റി കോളജിലും പെരിന്തല്‍മണ്ണ ഗവ. പോളിടെക്‌നിക്കിലും നടന്ന സംഭവങ്ങളെന്നും യോഗം കുറ്റപ്പെടുത്തി. പെരിന്തല്‍മണ്ണ ഗവ. പോളിടെക്‌നിക്കില്‍ വിദ്യാര്‍ഥിയെ മര്‍ദിക്കുകയും ഇതറിഞ്ഞെത്തിയ മാതാവിനെയും അക്രമിച്ചത് എസ്.എഫ്.ഐക്കുള്ളിലെ ക്രിമിനല്‍വല്‍ക്കരണത്തിന്റെ തെളിവാണെന്നും യോഗം കുറ്റപ്പെടുത്തി. കെ.പി ബാസിത്ത് അധ്യക്ഷനായി. പി. ജംഷീര്‍, ടി.പി നസീഫ് സംസാരിച്ചു.