തിരുവനന്തപുരം: ജുവനൈല്‍ ജസ്റ്റിസ് ആക്ടിന്റെ പരിധിയില്‍നിന്ന് കേരളത്തെ ഒഴിവാക്കാന്‍ സംസ്ഥാന സര്‍ക്കാര്‍ കേന്ദ്രസര്‍ക്കാരില്‍ സമ്മര്‍ദം ചെലുത്തണമെന്ന് എം. ഉമ്മര്‍ നിയമസഭയില്‍ ആവശ്യപ്പെട്ടു. ഈ ആക്ട് മൂലം സംസ്ഥാനത്തെ അനാഥാലയങ്ങള്‍ വലിയ പ്രതിസന്ധി നേരിടുകയാണെന്ന് അദ്ദേഹം ബജറ്റ് ചര്‍ച്ചയില്‍ പറഞ്ഞു.
സംസ്ഥാനത്ത് 161 അനാഥാലയങ്ങള്‍ പൂട്ടേണ്ട അവസ്ഥയാണ്. അവ പൂട്ടിയാല്‍ 20,000ത്തിലധികം കുട്ടികള്‍ വഴിയാധാരമാകും. ഇത് അനാഥക്കുട്ടികളോടു ചെയ്യുന്ന വലിയ അനീതിയാണ്. അങ്ങനെ പൂട്ടുന്ന അനാഥാലയങ്ങളിലെ കുട്ടികളെ സര്‍ക്കാര്‍ ഏറ്റെടുക്കണമെന്നാണ് കേന്ദ്രം പറയുന്നത്. അതു സര്‍ക്കാരിനു വലിയ സാമ്പത്തിക ബാധ്യതയുണ്ടാക്കും. സംസ്ഥാനത്തെ അനാഥശാലകള്‍ കുട്ടികളെ സംരക്ഷിക്കുക മാത്രമല്ല അവര്‍ക്കു മികച്ച വിദ്യാഭ്യാസം നല്‍കുന്നുണ്ടെന്നും ഉമ്മര്‍ പറഞ്ഞു.