റിയാദ്: സഊദിയിലെത്തിയ ഇന്ത്യന്‍ വിദേശകാര്യ മന്ത്രി സുഷമാ സ്വരാജ് സഊദി വിദേശകാര്യ മന്ത്രി ആദില്‍ അല്‍ ജുബൈറുമായി കൂടിക്കാഴ്ച നടത്തി. റിയാദില്‍ നടന്ന കൂടിക്കാഴ്ചയില്‍ ഇരു രാജ്യങ്ങളും തമ്മില്‍ നിലനില്‍ക്കുന്ന സൗഹാര്‍ദ-സഹകരണ അന്തരീക്ഷം ഊട്ടിയുറപ്പിക്കാന്‍ മന്ത്രിമാര്‍ ആഹ്വാനം ചെയ്തു. ബിസിനസ്, വ്യപാരം, ഊര്‍ജം, പ്രതിരോധം എന്നീ മേഖലകളില്‍ ഇരു രാജ്യങ്ങളും സഹകരണം ശക്തമാക്കുകയും വിശ്വാസം ഉയര്‍ത്തിപ്പിടിക്കുകയും ചെയ്യും.
ഇന്ത്യന്‍ അംബാസിഡര്‍ അഹ്മദ് ജാവേദ്, വിവിധ സഊദി ഇന്ത്യന്‍ എംബസി ഉദ്യോഗസ്ഥര്‍ തുടങ്ങിയവര്‍ കൂടിക്കാഴ്ചയില്‍ പങ്കെടുത്തു. സഊദി ദേശീയോത്സവമായ 'ജനാദിരിയ്യ' പൈതൃകോത്സവത്തില്‍ അതിഥി രാജ്യമായ ഇന്ത്യയെ പ്രതിനിധീകരിച്ച് പങ്കെടുക്കാനാണ് സുഷമ സ്വരാജ് സഊദിയിലെത്തിയത്. നാളെ അവര്‍ സഊദിയില്‍ നിന്ന് യാത്രതിരിക്കും.