ദമസ്‌കസ്: വടക്കന്‍ സിറിയയിലെ വിമത മേഖലയില്‍ 48 മണിക്കൂറിനിടെ സിറിയന്‍ സേന 700 ലേറെ വ്യോമാക്രമണങ്ങള്‍ നടത്തിയതായി റിപ്പോര്‍ട്ട്. എത്രപേര്‍ കൊല്ലപ്പെട്ടുവെന്ന് വ്യക്തമല്ല. അലെപ്പോയിലാണ് ആക്രമണം രൂക്ഷമായത്. സിറിയയിലെ അലെപ്പോ, ഹുംസ്, ദരായ എന്നീ മൂന്നു നഗരങ്ങള്‍ വിമതരുടെ നിയന്ത്രണത്തിലാണ്. ഇവിടെയാണ് കൂടുതല്‍ ജനങ്ങള്‍ താമസിക്കുന്നത്. കൊല്ലപ്പെട്ടവരില്‍ ഭൂരിഭാഗവും സ്ത്രീകളും കുട്ടികളുമാണ്. ജനവാസ കേന്ദ്രങ്ങളിലെ കെട്ടിടങ്ങളാണ് ബോംബിട്ട് തകര്‍ക്കുന്നത്.
സിറിയന്‍ പ്രസിഡന്റ് ബശര്‍ അല്‍ അസദ് കഴിഞ്ഞ അഞ്ചുവര്‍ഷമായി സ്വന്തം പൗരന്മാരെ കൊന്നൊടുക്കുന്നതിന്റെ ദയനീയ കാഴ്ചകളാണ് ഇതെന്ന് രക്ഷാപ്രവര്‍ത്തകര്‍ പറഞ്ഞു. സിറിയയില്‍ വെടിനിര്‍ത്തലിനും സമാധാനം സ്ഥാപിക്കാനുമുള്ള യു.എന്‍ ശ്രമങ്ങള്‍ക്കിടെയാണ് ആക്രമണം രൂക്ഷമാകുന്നത്.