ശ്രീകണ്ഠപുരം: പയ്യാവൂര്‍ ഊട്ട് ഉല്‍സവത്തിന് ചുളിയാട് ദേശവാസികള്‍ ഒരുക്കുന്ന ഓമനക്കാഴ്ച്ചയിലെ പെരുമകള്‍ നാട്ടിന്റെയും സംസ്‌കൃതിയുടെയും പാരമ്പര്യത്തനിമ വിളിച്ചോതുന്നതിനൊപ്പം സാഹോദര്യത്തിന്റെ പ്രതീകമാവുന്നു. ചൂളിയാട് ഗ്രാമത്തിലെ അഞ്ചിടങ്ങളിലെ കുഴികളില്‍ വാഴക്കുലകള്‍ പഴുക്കാന്‍ വെച്ച് മുന്നുദിനം പിന്നിട്ടതിന് ശേഷം കുഴികളില്‍ നിന്ന് എടുത്ത് പന്തലുകളില്‍ ഒരു ദിനം തൂക്കിവെച്ച് പിറ്റേ ദിവസം ഓമനക്കാഴ്ചക്കായി കാല്‍നടയായി പയ്യാവൂരിലേക്ക് കൊണ്ടു പോകും.
ഇത് ഓമനക്കാഴ്ച്ച എന്ന പേരില്‍ പയ്യാവുര്‍ ഉല്‍സവത്തില്‍ വര്‍ഷങ്ങളായുള്ള ചടങ്ങാണ്.
ചൂളിയാട് ഗ്രാമത്തിലെ തിയ്യ സമുദായത്തില്‍പ്പെട്ടവര്‍ വ്രതശുദ്ധിയില്‍ വാഴക്കുലകള്‍ അന്വേഷിച്ച് പോകുകയും, പ്രദേശത്തെ ഓരോ ആണ്‍ പ്രജകളുടെ എണ്ണത്തിന്റെ അടിസ്ഥാനത്തില്‍ ഒരാള്‍ക്ക് രണ്ട് കുല എന്ന തോതില്‍ മൂപ്പെത്താത്ത അടുക്കന്‍ വാഴക്കുലകള്‍ ശേഖരിക്കുകയും ചെയ്യുന്നു. തൈവളപ്പ്, ചമ്പോച്ചേരി, നല്ലുര്‍, തടത്തില്‍കാവ്, തൈവളപപ്പ് എന്നിവിടങ്ങളിലെ കുഴിയില്‍ വെച്ച് പഴുപ്പിച്ച് പയ്യാവൂര്‍ മഹോല്‍സവത്തിന്റെ സമാപന ദിവസമായ കുംഭം പത്തിന്റെ തലേന്ന് അതാത് പന്തലുകളില്‍ തുക്കും.
വറുതിയുടെ ഒരു കാലത്ത് പയ്യാവൂര്‍ ഊട്ടിന് പഴക്കുലകള്‍ എത്തിക്കാന്‍ കിരാതമൂര്‍ത്തി ചുളിയാട് ദേശവാസികളെ ചുമതലപ്പെടുത്തിയെന്ന ഐതിഹ്യത്തിന്റെ ഭാഗമായി നടക്കുന്ന ഓമനക്കാഴ്ച്ച കാണാന്‍ അഡുവപ്പുറം തടത്തില്‍ കാവിലേക്ക് ദേശവാസികളും സമീപ ഗ്രാമവാസികളും കുടുംബസമേതം എത്തും. കവുങ്ങിന്റെ വാരി ചെത്തി മിനുക്കിയുണ്ടാക്കിയ തണ്ടുകളിലേറ്റി പ്രദേശത്തെ തീയ്യ സമുദായത്തില്‍പ്പെട്ട 700 ഓളം പേര്‍ വാദ്യമേളങ്ങളുടെയും, മുത്ത് കുടകളുടെയും അകമ്പടിയോടെ 14 കിലോമീറ്റര്‍ കാല്‍നടയായി 22ന് വൈകുന്നേരം നാലരയോടെ പയ്യാവുരിലെത്തും.പൗരാണിക കാലം മുതല്‍ ദേവന് കാഴ്ചവെക്കാന്‍ കുടകിന്‍ നിന്ന് ഭക്തര്‍ കാളപ്പുറത്ത് അരിയുമായി വരുന്നത് ഉല്‍സവത്തിന്റെ പ്രത്യേകതയാണ്.
ഉല്‍സവം 27ന് രാത്രി പത്തിന് മാങ്ങാടന്‍ വയല്‍ തിറയോടെയാണ് സമാപിക്കുക.