മഞ്ചേരി: മഞ്ചേരി മെഡിക്കല്‍ കോളജില്‍ ഒരു പകല്‍ മുഴുവന്‍ വൈദ്യുതി മുടങ്ങിയതു കാരണം ഗുരുതരാവസ്ഥയിലെത്തിയ നൂറുകണക്കിനു രോഗികള്‍ വലഞ്ഞു. ഇന്നലെ രാവിലെ മുതലാണ് മെഡിക്കല്‍ കോളജില്‍ വൈദ്യുതി മുടങ്ങിയത്. ഇതോടൊപ്പം ജനറേറ്ററും പ്രവര്‍ത്തനരഹിതമായതോടെ ദുരിതം ഇരട്ടിയായി.
ഇതോടെ രാവിലെ മുതല്‍ സ്‌കാനിങ്, എക്‌സ്‌റേ, പോസ്റ്റ്‌മോര്‍ട്ടം എന്നിവ നടന്നില്ല. ചികിത്സ ലഭ്യമാകാത്തതിനെ തുടര്‍ന്നു രോഗികള്‍ പലരും തിരിച്ചുപോയി. അവധി ദിനമായതിനാല്‍ സ്‌കാനിങ്, എക്‌സ്‌റേ എന്നീ ആവശ്യങ്ങള്‍ക്കു മറ്റു ലാബുകളെ സമീപിക്കാനും കഴിഞ്ഞിരുന്നില്ല. അത്യാഹിത വിഭാഗത്തിലെത്തിയ രോഗികളെ ഡോക്ടര്‍മാര്‍ പരിശോധിച്ചതും മുറിവുകള്‍ കെട്ടിയതും മൊബൈല്‍ ഫ്‌ളാഷ് , എമര്‍ജന്‍സി തുടങ്ങിയ ലൈറ്റുകള്‍ ഉപയോഗിച്ചായിരുന്നു.
വൈദ്യുതി മുടക്കം കാരണം ലിഫ്റ്റ് പ്രവര്‍ത്തനരഹിതമാകുകയും അടിയന്തിര ആവശ്യങ്ങള്‍ക്കുപോലും വെള്ളം ലഭ്യമല്ലാതാകുകയും ചെയ്തു. ഇതോടെ രോഗികളും കൂട്ടിയിരിപ്പുകാരും ഏറെ പ്രയാസപ്പെട്ടു. ബാത്ത്‌റൂമിലേക്കു പോകുന്നതിനും മറ്റ് അടിയന്തിര ആവശ്യങ്ങള്‍ക്കുപോലും വെള്ളം ലഭിക്കാതെവന്നതോടെ എന്തുചെയ്യണമെന്നറിയാതെ രോഗികള്‍ വലഞ്ഞു. വെളിച്ചമില്ലാതെ തങ്ങള്‍ എന്തുചെയ്യണമെന്ന രോഗികളുടെ ചോദ്യത്തിനു മുന്നില്‍ മെഡിക്കല്‍ കോളജ് അധികൃതരും കുഴങ്ങി.