കോഴിക്കോട്: രാജ്യത്തിന്റെ പുരോഗതിക്ക് വനിതകളുടെ വിദ്യാഭ്യാസം അനിവാര്യമാണെന്നും മുസ്‌ലിം വനിതകളുടെ വിദ്യാഭ്യാസത്തിന് കൂടുതല്‍ പരിഗണന നല്‍കണമെന്നും ഉപരാഷ്ട്രപതി വെങ്കയ്യ നായിഡു. കോഴിക്കോട് റൗദത്തുല്‍ ഉലൂം അസോസിയേഷന്‍ ആന്‍ഡ് അറബിക് കോളജിന്റെ പ്ലാറ്റിനം ജൂബിലി ആഘോഷത്തിന്റെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഒരു പുരുഷന് നല്‍കുന്ന വിദ്യാഭ്യാസം അവന് മാത്രമായുള്ളതാണ്. എന്നാല്‍ ഒരു സ്ത്രീക്ക് നല്‍കുന്ന വിദ്യാഭ്യാസം ആ കുടുംബത്തിനാകെ ലഭിക്കുന്ന വിദ്യാഭ്യാസമാണ്.
വിശുദ്ധ ഖുര്‍ആനിലെ ആദ്യത്തെ വാക്ക് വായിക്കുക എന്നര്‍ഥം വരുന്ന ഇഖ്ര ആണ്. കൂടാതെ ദൈവമേ, എന്നില്‍ അറിവ് ചൊരിഞ്ഞാലും എന്ന പ്രാര്‍ഥനയും ഉള്‍ക്കൊള്ളുന്നു. അറിവിനേക്കാള്‍ ശുദ്ധമായതൊന്നും ഈ ലോകത്തിലില്ലെന്നാണ് ഭഗവത്ഗീതയില്‍ പറയുന്നത്.
വിദ്യാഭ്യാസ സ്ഥാപനങ്ങളുടെ വളര്‍ച്ച സര്‍ക്കാര്‍ മാത്രം ശ്രമിച്ചാല്‍ സാധിക്കുന്നതല്ല. പൊതു സ്വകാര്യ പങ്കാളിത്തവും നടപ്പിലാക്കണം.
വിദ്യാഭ്യാസ രംഗത്ത് ഏഴ് പതിറ്റാണ്ടിലേറെയായി നിലകൊള്ളുന്ന റൗദത്തുല്‍ ഉലൂം അസോസിയേഷന്റെ പ്രവര്‍ത്തനം നിസ്തുലമാണ്. സ്ഥാപനത്തില്‍ നിന്നുള്ള 10000 വിദ്യാര്‍ഥികളില്‍ 6000 പേര്‍ പെണ്‍കുട്ടികളാണെന്ന കാര്യം അഭിനന്ദനാര്‍ഹമാണെന്നും അദ്ദേഹം കൂട്ടിച്ചേര്‍ത്തു.
വൈവിധ്യങ്ങളെ ഒന്നാക്കാനുള്ള ശ്രമങ്ങള്‍ക്ക് പകരം അതില്‍ സൗന്ദര്യം കണ്ടെത്തുകയാണ് വേണ്ടതെന്ന് ആശംസയര്‍പ്പിച്ച് സംസാരിച്ച മന്ത്രി കെ.ടി ജലീല്‍ പറഞ്ഞു. ഭാഷകള്‍ക്ക് രാജ്യാതിര്‍ത്തിയോ മതമോ, വിവേചനമോ ഇല്ല. ഭാഷയിലെ വൈരുധ്യങ്ങള്‍ക്കപ്പുറം സാമ്യത കണ്ടെത്താനുള്ള ശ്രമമാണ് നടത്തേണ്ടതെന്നും അദ്ദേഹം കൂട്ടിച്ചേര്‍ത്തു. ഫാറൂഖ് കോളജിലെ എ.പി ബാവ കണ്‍വന്‍ഷന്‍ സെന്ററില്‍ നടന്ന ചടങ്ങില്‍ കോളജിന്റെ സുവനീര്‍ പ്രകാശനം എം.കെ രാഘവന് നല്‍കിയും ഡോക്യുമെന്ററി പ്രകാശനം വി.കെ.സി മമ്മദ് കോയക്ക് നല്‍കിയും ഉപരാഷ്ട്രപതി നിര്‍വഹിച്ചു. ഫാറൂഖ് കോളജ് പ്രിന്‍സിപ്പാള്‍ പ്രൊഫ. ഇ.പി ഇമ്പിച്ചിക്കോയ ഉപരാഷ്ട്രപതിക്ക് ഉപഹാരം നല്‍കി. എം.പിമാരായ എം.കെ രാഘവന്‍, പി.വി അബ്ദുല്‍ വഹാബ്, കാലിക്കറ്റ് സര്‍വകലാശാല വൈസ് ചാന്‍സലര്‍ ഡോ. കെ മുഹമ്മദ് ബഷീര്‍, പ്രൊഫ. എ. കുട്ട്യാലിക്കുട്ടി, കെ.വി കുഞ്ഞഹമ്മദ് കോയ, പി.കെ അഹമ്മദ്, സി.പി കുഞ്ഞിമുഹമ്മദ് സംബന്ധിച്ചു.