ജിദ്ദ: രണ്ടു ദിവസത്തെ സന്ദര്‍ശനത്തിനായി കേന്ദ്ര ധനകാര്യ മന്ത്രി അരുണ്‍ ജെയ്റ്റ്‌ലി സഊദിയിലെത്തി. ഇന്ത്യ -സഊദി പന്ത്രണ്ടാമത് ജോയിന്റ്് കൗണ്‍സില്‍ യോഗത്തിനായാണ് ജെയ്റ്റ്‌ലി എത്തിയത്. ഇന്നു ഉച്ചക്ക് 12 മണിക്കാണ് യോഗം. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം മെച്ചപ്പെടുത്തുന്നതും സന്ദര്‍ശനത്തിനിടെ ചര്‍ച്ചയാകും.

സന്ദര്‍ശനത്തിന്റെ ഭാഗമായി രാവിലെ സഊദി വാണിജ്യ മന്ത്രാലയത്തിന്റെ സാങ്കേതിക വിഭാഗം യോഗം ചേര്‍ന്നു. ഉച്ചക്ക് ഒരു മണിക്ക് നടക്കുന്ന സഊദി-ഇന്ത്യ ബിസിനസ് കൗണ്‍സിലിന്റെ യോഗത്തില്‍ ഇരു രാജ്യങ്ങളിലേയും ധനകാര്യ മന്ത്രിമാര്‍ പങ്കെടുക്കും. ഉച്ചക്ക് ശേഷം സഊദിയിലെ ജനാദ്രിയ പൈതൃക ഗ്രാമത്തിലും മന്ത്രി സന്ദര്‍ശനം നടത്തും. തുടര്‍ന്ന് സൗദി വാണിജ്യ നിക്ഷേപ വ്യവസായ മന്ത്രി ഡോ. മാജിദ് അല്‍ ഖസ്ബിയും ജെയ്റ്റ്‌ലിയും തിങ്കളാഴ്ച ഉഭയകക്ഷി വിഷയങ്ങള്‍ ചര്‍ച്ച ചെയ്യും. വിവിധ കരാറുകളിലും ഇരു രാജ്യങ്ങളും ഒപ്പു വെക്കും.