തൊടുപുഴ: സംസ്ഥാന ന്യൂനപക്ഷ ക്ഷേമ വകുപ്പിന് കീഴില്‍ തൊടുപുഴയില്‍ പ്രവര്‍ത്തിക്കുന്ന പിന്നോക്ക യുവജനതക്കായുള്ള പരിശീലന കേന്ദ്രത്തില്‍ ജൂലൈ മാസത്തില്‍ ആരംഭിക്കുന്ന പി.എസ്.സി ഫൗണ്ടേഷന്‍ കോഴ്‌സിന്റെ പുതിയ ബാച്ചിലേക്കുള്ള അപേക്ഷ ക്ഷണിച്ചു.
പ്രവേശന പരീക്ഷയുടെ അടിസ്ഥാനത്തില്‍ പ്രവേശനം ലഭിക്കുന്ന ഉദ്യോഗാര്‍ഥികള്‍ക്ക് പരിശീലനം തികച്ചും സൗജന്യമായിരിക്കും. റെഗുലര്‍, ഹോളിഡേ ബാച്ചുകളിലേക്കായി 80 ശതമാനം സീറ്റുകള്‍ മുസ്‌ലിം വിഭാഗത്തിനും 20 ശതമാനം സീറ്റുകള്‍ മറ്റ് ന്യൂനപക്ഷ പിന്നോക്ക വിഭാഗത്തിനുമായി സംവരണം ചെയ്തിട്ടുണ്ട്. ആറ്  മാസക്കാലമാണ് പരിശീലന കാലാവധി. ജനറല്‍ ഇംഗ്ലീഷ്, മാത്‌സ്, മലയാളം, ആനുകാലികം, ജി.കെ, ഐ.ടി, ബേസിക് സയന്‍സ്, ബാങ്കിംഗ് തുടങ്ങിയ വിഷയങ്ങളില്‍ പ്രഗത്ഭരായ അധ്യാപകര്‍ ക്ലാസുകള്‍ക്ക് നേതൃത്വം നല്‍കും.
എസ്.എസ്.എല്‍.സി പാസ്സാവുകയും 18 വയസ്സ് തികയുകയും ചെയ്ത ഉദ്യോഗാര്‍ത്ഥികള്‍ യോഗ്യത തെളിയിക്കുന്ന രേഖകള്‍, പാസ്‌പോര്‍ട്ട് സൈസ് ഫോട്ടോ എന്നിവയുമായി  17 നകം നിര്‍ദ്ദിഷ്ട ഫോമില്‍ അപേക്ഷ സമര്‍പ്പിക്കണം. അപേക്ഷകള്‍ കോച്ചിംഗ് സെന്റര്‍ ഫോര്‍ മുസ്‌ലിം യൂത്ത്, ദാഇ എ മില്ലത്ത് കോളജ് ബില്‍ഡിംഗ്, കാരിക്കോട്, തൊടുപുഴ ഈസ്റ്റ് പി.ഒ എന്ന വിലാസത്തിലോ നേരിട്ടോ നല്‍കണം.
ഫോറം ഓഫീസില്‍ നിന്ന് നേരിട്ടും ന്യൂനപക്ഷ ക്ഷേമ വകുപ്പിന്റെ വെബ്‌സൈറ്റിലും ലഭ്യമാണ്.  കൂടുതല്‍ വിവരങ്ങള്‍ക്ക് 04862 209817, 9745275717 എന്നീ നമ്പരുകളില്‍ ബന്ധപ്പെടണമെന്ന് പ്രിന്‍സിപ്പല്‍  അറിയിച്ചു.