ആര്‍പ്പൂക്കര: മെഡിക്കല്‍ കോളേജ് ആശുപത്രിയില്‍ പേസ് മേക്കര്‍ ലഭിക്കാത്തതിനെ തുടര്‍ന്ന് രോഗിയുടെ ചികിത്സ മുടങ്ങി. ചേര്‍ത്തല സ്വദേശി അശോകന്റെ ( 62 ) ചികിത്സയാണ് മുടങ്ങിയത്.
ഹൃദയമിടിപ്പ് വളരെ കൂടുതലായ അശോകന് ഇത് ക്രമീകരിക്കുന്നതിനാണ് പേസ് മേക്കര്‍ വക്കുന്നതിന് ഡോക്ടര്‍മാര്‍ തീരുമാനിച്ചത്. എന്നാല്‍ ആരോഗ്യ ഇന്‍ഷുറന്‍സ് പദ്ധതി പ്രകാരം പേസ് മേക്കര്‍ നല്‍കുന്നതിന് അനുമതി ലഭിച്ചെങ്കിലും കമ്പനികള്‍ക്ക് കോടിക്കണക്കിന് രൂപാ കുടിശ്ശിക ഉള്ളതിനാല്‍ ഉപകരണം ലഭ്യമാക്കാന്‍ കഴിഞ്ഞിരുന്നില്ല.
സ്റ്റെന്റ്, പേസ് മേക്കര്‍ എന്നിവ മെഡിക്കല്‍ കോളജുകള്‍ക്ക് സ്വകാര്യ കമ്പനിയാണ് നല്‍കുന്നത്. 70 കോടിയോളം സംസ്ഥാനത്തെ വിവിധ ഗവ. മെഡിക്കല്‍ കോളജുകളില്‍ നിന്ന് കമ്പനികള്‍ക്ക് നല്‍കാനുണ്ട്. അതില്‍ 25 കോടിയിലധികം കോട്ടയം മെഡിക്കല്‍ കോളേജില്‍ നിന്നുള്ളതാണ്.
1,40,000 രൂപയാണ് ഒരു പേസ് മേക്കറിന്റെ വില. ഇത് ആശുപത്രിയില്‍ സ്റ്റോക്ക് ചെയ്യാറില്ല. ഹൃദ്‌രോഗികള്‍ക്ക് ആവശ്യമായി വരുമ്പോള്‍ മാത്രം എത്തിക്കുകയാണ് ചെയ്യുന്നത്. അശോകന്‍ കാരുണ്യ പദ്ധതി പ്രകാരം അപേക്ഷ നല്‍കുകയും പേസ് മേക്കര്‍ വയ്ക്കുന്നതിന് അനുമതി ലഭിക്കുകയും ചെയ്തതാണ്.
എന്നാല്‍ ബന്ധപ്പെട്ട കമ്പനിക്ക് കോടിക്കണക്കിന് രൂപാ കുടിശ്ശികയുള്ളതിനാല്‍ പേസ് മേക്കര്‍ നല്‍കില്ലെന്ന് അറിയിക്കുകയായിരുന്നു. എന്നാല്‍ 20 കോടി രൂപ കാരുണ്യ പദ്ധതിയിലെ ചെലവുകള്‍ക്കായി അനുവദിച്ചിട്ടുണ്ടെന്നും രണ്ടു ദിവസത്തിനുള്ളില്‍ ട്രഷറിയില്‍ നിന്നും നടപടി പൂര്‍ത്തികരിച്ച് പണം കൈപ്പറ്റുമെന്നുമാണ് ആശുപത്രി അധികൃതരുടെ വിശദീകരണം.