ചങ്ങരംകുളം: ചൂടു കൂടിയതോടെ പൊന്നാനി കോളില്‍ വെള്ളത്തിന്റെ അളവ് കുറയുന്നു. പ്രധാനമായും വെള്ളം ശേഖരിച്ചുവച്ചിട്ടുള്ള നരണിപ്പുഴ, നുറടി തോട്, ബിയ്യം എന്നിവിടങ്ങളില്‍ അനുദിനം ജലനിരപ്പ് താഴുന്നു.
വെള്ളത്തിന്റെ അളവില്‍ കുറവ് രേഖപ്പെടുത്തിയതോടെ കരുതല്‍ ശേഖരമായി സംഭരിച്ചുവച്ച വെട്ടിക്കാട് തിരുത്തിക്കാട് റിസോര്‍വേയറിലെ വെള്ളം നുറടിത്തോടിലേക്ക് കഴിഞ്ഞദിവസം മുതല്‍ ഒഴുക്കിവിടാന്‍ തുടങ്ങി. എണ്ണായിരം ഏക്കറിലാണ് ഇത്തവണ നെല്‍ക്കൃഷി ചെയ്തിട്ടുള്ളത്.
രണ്ടാഴ്ചയ്ക്കുശേഷം വിളവെടുക്കാനുള്ള തെക്കന്‍ മേഖലയിലെ പാടശേഖരങ്ങളില്‍ കൂടുതല്‍ വെള്ളം ഉപയോഗിക്കേണ്ടി വന്നതും ജലനിരപ്പ് കുറയാനിടയാക്കി. വേനല്‍ ശക്തമായി തുടര്‍ന്നാല്‍ വൈകി നടീല്‍ നടത്തിയ പാടശേഖരങ്ങളിലെ കൃഷിക്ക് ജലക്ഷാമമുണ്ടാകുമെന്ന ആശങ്കയിലാണ് കര്‍ഷകര്‍.
തേരറ്റ് കായല്‍, തുരുത്തുമ്മല്‍, മറയല്‍, പരൂര്‍, നരണിപ്പുഴകുമ്മിപ്പാലം, അരിയോടി പാടശേഖരങ്ങളെയാണ് വെള്ളത്തിന്റെ കുറവ് ബാധിക്കുക. ഈ പാടശേഖരങ്ങളില്‍ 70 ദിവസത്തെ കൃഷിക്കുള്ള വെള്ളമാണ് വേണ്ടിവരികയെന്ന് കര്‍ഷകര്‍ പറഞ്ഞു.