കോഴിക്കോട്: വൈദ്യുതി അപകടങ്ങള്‍ കുറയ്ക്കുന്നതിനായി കര്‍ശന നടപടികളുമായി വൈദ്യുതി അപകട നിയന്ത്രണ ജില്ലാ സമിതിയോഗം. കഴിഞ്ഞ വര്‍ഷം ജില്ലയില്‍ വൈദ്യുതി അപകടങ്ങളിലൂടെ 16 പേര്‍ക്ക് ജീവന്‍ നഷ്ടപ്പെട്ട സാഹചര്യത്തിലാണ് പുതിയ നടപടികളിലേക്ക് സമിതി നീങ്ങിയത്. സുരക്ഷിതമായ വൈദ്യുതി ഉപയോഗത്തെക്കുറിച്ച് ബോധവല്‍ക്കരണ പരിപാടികള്‍ സ്‌കൂളുകളിലും റസിഡന്റ്‌സ് അസോസിയേഷനുകളിലും നടത്തും. വൈദ്യുതി വകുപ്പിലെ വിദഗ്ധരെ ബോധവല്‍ക്കരണ പരിപാടികള്‍ക്ക് നേതൃത്വം നല്‍കാന്‍ സജ്ജമാക്കും. എല്ലാ സ്‌കൂളുകളിലും ഇലക്ട്രിക്കല്‍ എര്‍ത്ത്‌ലീക്ക് സര്‍ക്യൂട്ട് ബ്രേക്കര്‍ സ്ഥാപിച്ചിട്ടുണ്ടെന്ന് വൈദ്യുതി വകുപ്പ് അധികൃതര്‍ നേരിട്ട് ഉറപ്പു വരുത്തണമെന്നും യോഗം നിര്‍ദേശിച്ചു.
വൈദ്യുതി കാലുകളില്‍ അംഗീകാരമില്ലാത്ത ഹോര്‍ഡിങ്‌സ് സ്ഥാപിക്കുന്നില്ലെന്ന് ഉറപ്പ് വരുത്താന്‍ തദ്ദേശ സ്വയംഭരണ സ്ഥാപനങ്ങള്‍ക്ക് സമിതി നിര്‍ദേശം നല്‍കി. അശ്രദ്ധമായി വൈദ്യുതി കാലുകളിലും മറ്റും ഹോര്‍ഡിങുകള്‍ സ്ഥാപിക്കുന്നത് അപകടങ്ങളിലേക്ക് നയിക്കുന്നതിനാലാണ് ജില്ലാ സമിതി ഇത്തരം തീരുമാനങ്ങളെടുത്തത്.
വാടക സാധനങ്ങള്‍ വിവിധ പൊതുപരിപാടിയ്ക്ക് വിതരണം ചെയ്യുന്നത് അംഗീകാരമുള്ള ഡീലേഴ്‌സ് ആണെന്ന് ഉറപ്പ് വരുത്തണം. സംസ്ഥാനത്ത് 250 പേര്‍ കഴിഞ്ഞ വര്‍ഷം വിവിധ വൈദ്യുതി അപകടങ്ങളിലൂടെ മരിച്ച സാഹചര്യത്തില്‍ മെയ് ഒന്ന് മുതല്‍ ഏഴ് വരെ സുരക്ഷാവാരം ആചരിക്കാനും യോഗം തീരുമാനിച്ചു.
വൈദ്യുതി ലൈനുകള്‍ക്ക് സമീപമുള്ള കായ്ഫലങ്ങള്‍, പഴങ്ങള്‍ എന്നിവ ലോഹ നിര്‍മിതമായ വസ്തുക്കള്‍ ഉപയോഗിച്ച് പറിക്കുമ്പോഴാണ് ഒട്ടേറെ അപകടങ്ങള്‍ ഉണ്ടായിരിക്കുന്നത്. യോഗത്തില്‍ എ.ഡി.എം ടി. ജനില്‍ കുമാര്‍, ഇ. മനോജ്, കെ.എഫ്. ജോസഫ്, എന്‍. കൃഷ്ണദാസ് പങ്കെടുത്തു.