തിരുവനന്തപുരം: ഇന്റര്‍നാഷനല്‍ പ്രസ് ഫോട്ടോ ഫെസ്റ്റ് രണ്ടാം എഡിഷന്‍ മുഖ്യമന്ത്രി പിണറായി വിജയന്‍ തിരുവനന്തപുരം ടാഗോര്‍ തിയറ്ററില്‍ ഇന്ന് വൈകിട്ട് ആറുമണിക്ക് ഉദ്ഘാടനം ചെയ്യും.
ചടങ്ങില്‍ കേരള മീഡിയ അക്കാദമിയുടെ പ്രഥമ വേള്‍ഡ് ഫോട്ടോഗ്രാഫര്‍ പ്രൈസ് ലോക പ്രശസ്ത ഫോട്ടോ ജേണലിസ്റ്റ് നിക്ക് ഉട്ടിന് മുഖ്യമന്ത്രി സമ്മാനിക്കും.
മന്ത്രി കടകംപളളി സുരേന്ദ്രന്‍ വിശിഷ്ടാതിഥിയായിരിക്കും. അക്കാദമി ചെയര്‍മാന്‍ ആര്‍.എസ് ബാബു അധ്യക്ഷനാകും. ലോസ് ആഞ്ചലസ് ടൈംസ് ഫോട്ടോ എഡിറ്റര്‍ റൗള്‍ റോ, വിഖ്യാത ഗസല്‍ ഗായകന്‍ അനൂപ് ജലോട്ട, പ്രശസ്ത വനിതാ ഫോട്ടോ ജേണലിസ്റ്റായ ഷിപ്രദാസ്, സരസ്വതി ചക്രബര്‍ത്തി, വി.എസ് ശിവകുമാര്‍ എം.എല്‍.എ, മേയര്‍ അഡ്വ. വി കെ പ്രശാന്ത്, മുഖ്യമന്ത്രിയുടെ മാധ്യമ ഉപദേഷ്ടാക്കളായ ജോണ്‍ ബ്രിട്ടാസ്, പ്രഭ വര്‍മ, മീഡിയ അക്കാദമി ജനറല്‍ കൗണ്‍സില്‍ അംഗങ്ങളായ കെ.ജെ തോമസ്, രാജാജി മാത്യൂ തോമസ് തുടങ്ങിയവര്‍ ചടങ്ങില്‍ പങ്കെടുക്കും.
തുടര്‍ന്ന് അനൂപ് ജലോട്ടയുടെ ഗസല്‍ സന്ധ്യ അരങ്ങേറും. കേരള മീഡിയ അക്കാദമിയുടെ ആഭിമുഖ്യത്തില്‍ ഇന്‍ഫര്‍മേഷന്‍ ആന്‍ഡ് പബ്ലിക്ക് റിലേഷന്‍സ് വകുപ്പ്, തിരുവനന്തപുരം പ്രസ് ക്ലബ്, കേസരി സ്മാരക ജേണലിസ്റ്റ് ട്രസ്റ്റ് എന്നിവയുടെ സഹകരണത്തോടെയാണ് ഇന്റര്‍നാഷനല്‍ പ്രസ് ഫോട്ടോ ഫെസ്റ്റിവല്‍ കേരള സെക്കന്‍ഡ് എഡിഷന്‍ സംഘടിപ്പിക്കുന്നത്.