ന്യൂഡല്‍ഹി: 2019ലെ ലോക്‌സഭാ തെരഞ്ഞെടുപ്പില്‍ ബി.ജെ.പിയെ പരാജയപ്പെടുത്തി കോണ്‍ഗ്രസ് അധികാരത്തില്‍ വരുമെന്ന സോണിയാ ഗാന്ധിയുടെ പ്രസ്താവന വെറും ദിവാസ്വപ്‌നമാണെന്ന് ബി.ജെ.പി നേതാവ് നിതിന്‍ ഗഡ്കരി. രാജ്യത്തെ ഓരോ സംസ്ഥാനങ്ങളിലുമുള്ള തെരഞ്ഞെടുപ്പില്‍ തോറ്റുകൊണ്ടിരിക്കുന്ന കോണ്‍ഗ്രസ്സിന് എങ്ങനെ 2019ലെ തെരഞ്ഞെടുപ്പിനെ കുറിച്ച് പറയാനാകുന്നതെന്ന് അദ്ദേഹം ചോദിച്ചു. ഇന്ത്യ ടുഡേ കോണ്‍ക്ലേവില്‍ സംസാരിക്കുകയായിരുന്നു ഗഡ്കരി.

ഓരോ തെരഞ്ഞെടുപ്പിന് ശേഷവും കോണ്‍ഗ്രസ് ദുര്‍ബലമായിക്കൊണ്ടിരിക്കുകയാണ്. മോദിയുടെ നേതൃത്വത്തില്‍ അടുത്ത ലോക്‌സഭാ തെരഞ്ഞെടുപ്പിലും ബി.ജെ.പി വന്‍വിജയം നേടും. കേരളത്തിലും ബംഗാളിലും ബി.ജെ.പി വന്‍ മുന്നേറ്റം നടത്താന്‍ പോവുകയാണെന്നും നിതിന്‍ ഗഡ്കരി പറഞ്ഞു.

കഴിഞ്ഞ ദിവസമാണ് മുന്‍ കോണ്‍ഗ്രസ് അധ്യക്ഷയായ സോണിയാ ഗാന്ധി കേന്ദ്ര സര്‍ക്കാരിനെതിരേ രൂക്ഷവിമര്‍ശനവുമായി രംഗത്തെത്തിയത്. വാജ്‌പേയ് സര്‍ക്കാരിന്റെ കാലത്ത് പ്രചരിപ്പിച്ചിരുന്ന ഇന്ത്യ തിളങ്ങുന്നുവെന്ന പ്രചാരണം പോലെയാണ് ഇപ്പോള്‍ മോദിയുടെ അച്ചാ ദിന്‍ പ്രചാരണമെന്നും സോണിയ ആരോപിച്ചു. 2019ലെ പൊതു തെരഞ്ഞെടുപ്പില്‍ ബി.ജെ.പിയെ തറപറ്റിച്ച് കോണ്‍ഗ്രസ് അധികാരത്തില്‍ വരുമെന്നും അവര്‍ പറഞ്ഞു.