തിരുവനന്തപുരം: ജിഷ വധക്കേസില്‍ പൊലിസിന്റെ നിഷ്‌ക്രിയത്വം അന്വേഷിക്കണമെന്ന് ആംനെസ്റ്റി ഇന്റര്‍നാഷനല്‍. പൊലിസിനെതിരേ അന്വേഷണം ആവശ്യപ്പെട്ട് ആഭ്യന്തരമന്ത്രിക്ക് കത്ത് നല്‍കുമെന്നും ആംനെസ്റ്റി ഇന്റര്‍നാഷനല്‍ വാര്‍ത്താസമ്മേളനത്തില്‍ പറഞ്ഞു.
ജിഷ വധക്കേസില്‍ പൊലിസ് എഫ്.ഐ.ആര്‍ രജിസ്റ്റര്‍ ചെയ്തിരുന്നുവെങ്കിലും അതിന്റെ പകര്‍പ്പ് ജിഷയുടെ വീട്ടുകാര്‍ക്ക് നല്‍കിയിട്ടില്ലെന്നും കത്തില്‍ ചൂണ്ടിക്കാട്ടുന്നു. ജിഷയുടെ അയല്‍വാസിയുടെ മോശം പെരുമാറ്റത്തെക്കുറിച്ചു പൊലിസില്‍ പരാതിപ്പെട്ടിട്ടും നപടി സ്വീകരിച്ചില്ല തുടങ്ങിയ കാര്യങ്ങളാണു കത്തില്‍ ചൂണ്ടിക്കാട്ടുന്നത്. ദലിത് സ്ത്രീകള്‍ എന്ന നിലയില്‍ പ്രദേശത്തെ മറ്റു സമുദായങ്ങളില്‍ നിന്നും പൊലിസില്‍ നിന്നും ഇവര്‍ ക്രൂരവിവേചനം നേരിട്ടതു വ്യക്തമാണ്. വിവേചനപൂര്‍വമായ നിഷ്‌ക്രിയത്വത്തിന് പൊലിസ് മറുപടി പറയണമെന്നും ആംനെസ്റ്റി ഇന്റര്‍നാഷനല്‍ ആവശ്യപ്പെട്ടു. ജിഷയ്ക്കും കുടുംബത്തിനും നീതി ഉറപ്പാക്കാന്‍ പുതിയ സര്‍ക്കാര്‍ തയാറാവണമെന്നും ആംനെസ്റ്റി ഇന്റര്‍നാഷനല്‍ ഇന്ത്യയുടെ വിമെന്‍സ് റൈറ്റ്‌സ് പ്രോഗ്രാം മാനേജര്‍ രേഖ രാജ് വ്യക്തമാക്കി .

പൊലിസ് നിഷ്‌ക്രിയത്വത്തിനെതിരേ സ്വതന്ത്രവും നീതിപൂര്‍വവുമായ അന്വേഷണം ആവശ്യപ്പെട്ടുകൊണ്ട് ആംനെസ്റ്റി ഇന്റര്‍നാഷനല്‍ നടത്തിയ കാംപയിനില്‍ കാല്‍ലക്ഷത്തിലധികം പേര്‍ ഒപ്പുവച്ചതായും ഭാരവാഹികള്‍ പറഞ്ഞു.
പൊലിസ് പുലര്‍ത്തിയ നിഷ്‌ക്രിയത്വത്തിനെതിരേ ജിഷയ്ക്കും കുടുംബത്തിനും നീതി ആവശ്യപ്പെട്ടുകൊണ്ട് മെയ് 14ന് ആരംഭിച്ച ആംനെസ്റ്റിയുടെ കാംപെയിനിലൂടെ ഓണ്‍ലൈന്‍ , മൊബൈല്‍പെറ്റിഷനില്‍ ആയിരക്കണക്കിനാളുകളാണ് ഒപ്പുവച്ചത്. തങ്ങളുടെ പരാതി മുഖ്യമന്ത്രിക്കു കൈമാറുമെന്നും രേഖാരാജ് പറഞ്ഞു.