ബംഗളൂരു: രാജ്യത്തെ 64 ബാങ്കുകളില്‍ അവകാശികളില്ലാതെ കിടക്കുന്നത് 11,302 കോടി രൂപയെന്ന് റിസര്‍വ് ബാങ്ക്. ആര്‍.ബി.ഐ ഇന്നലെ പുറത്തുവിട്ട ഡാറ്റയിലാണ് ഇക്കാര്യം വ്യക്തമാക്കിയിട്ടുള്ളത്. അവകാശികളില്ലാത്തതോ അല്ലെങ്കില്‍ ഒന്നിലധികം അക്കൗണ്ടുകളിലുള്ളതോ ആയിരിക്കാം ഇത്രയും പണമെന്നും ആര്‍.ബി.ഐ പറയുന്നു.
അവകാശികളില്ലാത്ത രീതിയില്‍ ഏറ്റവും കൂടുതല്‍ പണമുള്ളത് എസ്.ബി.ഐയിലാണ്. 1,262 കോടി രൂപയാണ് ഇവിടെയുള്ളത്. പഞ്ചാബ് നാഷനല്‍ ബാങ്കില്‍ 1,250 കോടി രൂപയാണുള്ളത്. മറ്റ് ബാങ്കുകളിലെല്ലാം കൂടി 7,040 കോടിയിലധികം രൂപയാണുള്ളത്.
സ്വകാര്യ ബാങ്കുകളായ അക്‌സിസ് ബാങ്ക്, ഡി.സി.ബി, എച്ച്.ഡി.എഫ്.സി, ഐ.സി.ഐ.സി.ഐ, ഇന്‍ഡസ്‌ലാന്‍ഡ്, കൊട്ടക്ക് മഹീന്ദ്ര, യസ് ബാങ്ക് എന്നിവയില്‍ 824 കോടി രൂപയും മറ്റ് 12 ബാങ്കുകളില്‍ 592 കോടി രൂപയും അവകാശികളില്ലാതെയുണ്ടെന്നാണ് ആര്‍.ബി.ഐ പറയുന്നത്. ഐ.സി.ഐ.സി ബാങ്കില്‍ മാത്രം 476 കോടിയും കൊട്ടക്ക് മഹീന്ദ്ര ബാങ്കില്‍ 151 കോടിയും അവകാശികളില്ലാതെ കിടക്കുന്നുണ്ട്. എച്ച്.എസ്.ബി.സി പോലുള്ള വിദേശ ബാങ്കുകളില്‍ 332 കോടിരൂപയുണ് ഇത്തരത്തിലുള്ളത്. എച്ച്.എസ്.ബി.സിയില്‍ മാത്രം 105 കോടി രൂപയുണ്ടെന്നും ആര്‍.ബി.ഐ പറയുന്നു.