കൊച്ചി: നടിയെ ആക്രമിച്ച കേസില്‍ ദിലീപിന്റെ ഹരജി തിങ്കളാഴ്ച പരിഗണിക്കും. കേസില്‍ പൊലിസ് ഹാജരാക്കിയ ദൃശ്യങ്ങള്‍ കൈമാറണമെന്ന ദിലീപിന്റെ ഹരജിയാണ് കോടതി പരിഗണിക്കുക. നിയമപരമായി പ്രതിക്കു ലഭിക്കേണ്ട ആനുകൂല്യങ്ങള്‍ അങ്കമാലി കോടതി പരിഗണിച്ചില്ലെന്ന് കാണിച്ചാണ് ദിലീപ് ഹരജി നല്‍കിയിരിക്കുന്നത്.

നടിയെ ആക്രമിക്കുന്ന ദൃശ്യങ്ങള്‍ നടനു നല്‍കാനാവില്ലെന്ന അങ്കമാലി കോടതി നേരത്തെ വ്യക്തമാക്കിയിരുന്നു. പ്രതിക്ക് ഇത് ലഭിച്ചാല്‍ നടിയുടെ സുരക്ഷയെ ബാധിക്കുമെന്ന പ്രോസിക്യൂഷന്‍ വാദം കോടതി അംഗീകരിക്കുകയായിരുന്നു. ഇതിനെതിരേ അന്ന് ദിലീപ് നല്‍കിയ ഹരജിയും കോടതി തള്ളിയിരുന്നു.

കേസിലെ പ്രധാന തെളിവായ ഈ ദൃശ്യങ്ങളില്‍ കൃത്രിമം നടന്നിട്ടുണ്ടെന്നാണ് ദിലീപിന്റെ വാദം. ദൃശ്യത്തിനൊപ്പമുള്ള സ്ത്രീശബ്ദം സംശയകരമാണെന്നും വിചാരണയ്ക്ക് മുമ്പ് തെളിവുകളെല്ലാം ലഭിക്കാന്‍ പ്രതിക്ക് അവകാശമുണ്ടെന്നും കാണിച്ചാണ് ദിലീപ് ദൃശ്യങ്ങള്‍ ആവശ്യപ്പെട്ടത്.