കൊച്ചി: അട്ടപ്പാടി ആദിവാസി വികസന പദ്ധതിയുടെ നോഡല്‍ ഓഫിസറായി ഐ.എ.എസ് ഉദ്യോഗസ്ഥനെ നിയമിക്കണമെന്ന ശുപാര്‍ശയില്‍ സര്‍ക്കാര്‍ സ്വീകരിച്ച നടപടികള്‍ വ്യക്തമാക്കി സത്യവാങ്മൂലം നല്‍കാന്‍ ഹൈക്കോടതി നിര്‍ദേശിച്ചു. അട്ടപ്പാടിയില്‍ ആദിവാസി യുവാവായ മധുവിനെ ആള്‍ക്കൂട്ടം തല്ലിക്കൊന്ന സംഭവത്തെത്തുടര്‍ന്ന് ഹൈക്കോടതി സ്വമേധയാ പരിഗണിച്ച ഹരജിയിലാണ് ഡിവിഷന്‍ ബെഞ്ചിന്റെ നടപടി. ഇന്നലെ ഹരജി പരിഗണിച്ചപ്പോള്‍ ക്ഷേമപ്രവര്‍ത്തനങ്ങള്‍ ഏകോപിപ്പിക്കാന്‍ പട്ടികജാതി - പട്ടിക വര്‍ഗ വകുപ്പിലെ കെ. കൃഷ്ണകുമാറിനെ പ്രൊജക്ട് ഓഫിസറായി നിയമിച്ചെന്ന് സര്‍ക്കാര്‍ വ്യക്തമാക്കി.
അദ്ദേഹമാണോ നോഡല്‍ ഓഫിസറെന്ന് ഈ ഘട്ടത്തില്‍ ചീഫ് ജസ്റ്റിസ് ഉള്‍പ്പെട്ട ഡിവിഷന്‍ ബെഞ്ച് ചോദിച്ചു. അല്ലെന്നും നോഡല്‍ ഓഫിസര്‍ നിയമനത്തിനുള്ള നടപടിയെടുത്തെന്നും സര്‍ക്കാരിനുവേണ്ടി ഹാജരായ സ്റ്റേറ്റ് അറ്റോര്‍ണി അറിയിച്ചു. തുടര്‍ന്നാണ് നടപടികള്‍ വ്യക്തമാക്കി സത്യവാങ്മൂലം നല്‍കാന്‍ ഹൈക്കോടതി നിര്‍ദേശിച്ചത്.