ചെന്നൈ: മുന്‍ തമിഴ്‌നാട് മുഖ്യമന്ത്രിയും അണ്ണാ ഡി.എം.കെ അധ്യക്ഷയുമായിരുന്ന ജയലളിത അസുഖബാധിതയായിട്ടും ആശുപത്രിയില്‍ പോകാന്‍ കൂട്ടാക്കിയിരുന്നില്ലെന്ന് വി.കെ ശശികലയുടെ വെളിപ്പെടുത്തല്‍.
ജയലളിതയുടെ മരണവുമായി ബന്ധപ്പെട്ട് സര്‍ക്കാര്‍ നിയോഗിച്ച ജസ്റ്റിസ് എ. അറുമുഖസാമി കമ്മിഷന്‍ മുന്‍പാകെയാണ് ശശികല ഇക്കാര്യം അറിയിച്ചത്. വസതിയിലെ ബാത്ത്‌റൂമില്‍ ജയലളിത കുഴഞ്ഞുവീണതിനെ തുടര്‍ന്ന് അവരെ അടിയന്തരമായി ആശുപത്രിയിലേക്ക് കൊണ്ടുപോയതായും അവരെക്കുറിച്ചുള്ള വിഡിയോ എടുക്കാന്‍ പറഞ്ഞത് ജയലളിത തന്നെയായിരുന്നുവെന്നും ശശികല പറഞ്ഞു.
ചെന്നൈ അപ്പോളോ ആശുപത്രിയില്‍ ചികിത്സയിലായപ്പോള്‍ അണ്ണാ ഡി.എം.കെയുടെ മുതിര്‍ന്ന നേതാക്കളായ ഒ. പനീര്‍ശെല്‍വം, എം. തമ്പിദുരൈ എന്നിവര്‍ ജയലളിതയെ കണ്ടിരുന്നുവെന്നും ശശികല അറിയിച്ചു.