മുംബൈ: ഇംഗ്ലീഷ് മണ്ണില്‍ ബാറ്റിങ് മെച്ചപ്പെടുത്തുക ലക്ഷ്യമിട്ട് ഇന്ത്യന്‍ ക്രിക്കറ്റ് ടീം ക്യാപ്റ്റന്‍ വിരാട് കോഹ്‌ലി കൗണ്ടി കളിക്കാനൊരുങ്ങുന്നു. ഐ.പി.എല്ലിന് ശേഷം കൗണ്ടിയില്‍ സറെയ്ക്ക് വേണ്ടിയാണ് കോഹ്‌ലി ഇറങ്ങുക. അതിന് ശേഷം നടക്കുന്ന ഇന്ത്യയുടെ ഇംഗ്ലണ്ട് പര്യടനം ലക്ഷ്യമിട്ടാണ് നായകന്റെ നീക്കം. അഞ്ച് ടെസ്റ്റുകളും മൂന്ന് ഏകദിനങ്ങളും, ടി20 മത്സരങ്ങളും അടങ്ങിയ പരമ്പരയാണ് ഇന്ത്യ ഇംഗ്ലണ്ടില്‍ കളിക്കുക. ഇംഗ്ലീഷ് മണ്ണില്‍ മോശം ബാറ്റിങ് റെക്കോര്‍ഡാണ് കോഹ്‌ലിക്കുള്ളത്. അഞ്ച് ടെസ്റ്റുകള്‍ കളിച്ച് കോഹ്‌ലി ഇവിടെ സ്വന്തമാക്കിയത് 134 റണ്‍സ് മാത്രമാണ്. ഇന്ത്യയുടെ ഇംഗ്ലണ്ട് പര്യടനത്തിന് മുന്‍പ് കൗണ്ടി കളിച്ച് സാഹചര്യവുമായി ഇണങ്ങുകയാണ് കോഹ്‌ലി മുന്നില്‍ കാണുന്നത്. ജൂണ്‍ 14ന് അഫ്ഗാനിസ്ഥാനെതിരായ ഏക ടെസ്റ്റിനുള്ള ഇന്ത്യന്‍ ടീമില്‍ കോഹ്‌ലി ഉണ്ടാകില്ല. ടെസ്റ്റ് പദവി ലഭിച്ച അഫ്ഗാനിസ്ഥാന്‍ തങ്ങളുടെ ആദ്യ ടെസ്റ്റ് മത്സരം ഇന്ത്യക്കെതിരേയാണ് കളിക്കുന്നത്.