കൊച്ചി: കലൂര്‍ അന്താരാഷ്ട്ര സ്റ്റേഡിയത്തില്‍ നടന്ന ഐ ലീഗ് സെക്കന്‍ഡ് ഡിവിഷന്‍ മത്സരത്തില്‍ കേരള ബ്ലാസ്റ്റേഴ്‌സ് റിസര്‍വ് ടീമിന് തകര്‍പ്പന്‍ ജയം. ഗ്രൂപ്പിലെ മൂന്നാം മത്സരത്തില്‍ മധ്യഭാരത് സ്‌പോര്‍ട്‌സ് ക്ലബിനെ എതിരില്ലാത്ത ആറ് ഗോളുകള്‍ക്കാണ് ബ്ലാസ്റ്റേഴ്‌സ് പരാജയപ്പെടുത്തിയത്.
ഷൈബര്‍ലോങ് ഖര്‍പന്റെ ഹാട്രിക്കാണ് ബ്ലാസ്റ്റേഴ്‌സിന് തുടര്‍ച്ചയായ രണ്ടാം ജയം സമ്മാനിച്ചത്. 16, 38, 54 മിനുട്ടുകളിലാണ് ഷൈബര്‍ലോങ് മധ്യഭാരതിന്റെ വല കുലുക്കിയത്. സഹല്‍ അബ്ദുല്‍ സമദ് രണ്ട് ഗോളുകള്‍ നേടി. അനന്തു മുരളിയാണ് മറ്റൊരു സ്‌കോറര്‍.
12ാം മിനുട്ടില്‍ അനന്തുവിലൂടെ തുടങ്ങിയ ബ്ലാസ്റ്റേഴ്‌സിന്റെ ഗോളടി മേളം 81ാം മിനുട്ടില്‍ സഹല്‍ രണ്ടാം ഗോള്‍ നേട്ടത്തോടെ പൂര്‍ത്തിയാക്കുമ്പോഴേക്കും മധ്യഭാരത് അടിയറവ് പറഞ്ഞിരുന്നു. ആദ്യ പകുതിയില്‍ 3-0ന് മുന്നിലായിരുന്ന ബ്ലാസ്റ്റേഴ്‌സ് രണ്ടാം പകുതിയിലും ആധിപത്യം നിലനിര്‍ത്തി.
മത്സരത്തിലേക്ക് തിരിച്ചുവരാനുള്ള മധ്യഭാരതിന്റെ ശ്രമങ്ങള്‍ ബ്ലാസ്റ്റേഴ്‌സ് പ്രതിരോധത്തില്‍ തട്ടി തകര്‍ന്നു. ഏപ്രില്‍ 12ന് എഫ്.സി കേരളയ്‌ക്കെതിരെയാണ് ബ്ലാസ്റ്റേഴ്‌സിന്റെ അടുത്ത മത്സരം.