സുല്‍ത്താന്‍ ബത്തേരി: വയനാട് ഡി.സി.സി ട്രഷറര്‍ എന്‍.എം വിജയന്റെയും മകന്റെയും ആത്മഹത്യ കേസില്‍ പ്രതി ചേര്‍ക്കപ്പെട്ട ഐ.സി.ബാലകൃഷ്ണന്‍ എം.എല്‍.എയും ഡി.സി.സി പ്രസിഡന്റ് എന്‍.ഡി അപ്പച്ചനും മുന്‍ ട്രഷറര്‍ കെ.കെ ഗോപിനാഥനും  മുന്‍കൂര്‍ ജാമ്യാപേക്ഷ നല്‍കി. 

ഐ.സി. ബാലകൃഷ്ണനും എന്‍.ഡി അപ്പച്ചനും കല്‍പറ്റ ജില്ലാ സെഷന്‍സ് കോടതിയേയും കെ.കെ. ഗോപിനാഥന്‍ ഹൈക്കോടതിയേയും ആണ് സമീപിച്ചത്. ആത്മഹത്യാ പ്രേരണകുറ്റം ചുമത്തിയതിന് പിന്നാലെ മൂവരുടേയും ഫോണുകള്‍ ഓഫ് ചെയ്ത നിലയിലാണ്. നേതാക്കള്‍ വയനാട്ടിലില്ലെന്നാണ് വിവരം. മുന്‍കൂര്‍ ജാമ്യാപേക്ഷ പരിഗണിക്കുന്നത് വരെ മാറി നില്‍ക്കാനാണ് ഇവര്‍ക്ക് കിട്ടിയ നിര്‍ദേശം.

കഴിഞ്ഞ ദിവസമാണ് സുല്‍ത്താന്‍ ബത്തേരി ഡിവൈ.എസ്.പി കെ.കെ അബ്ദുല്‍ ശരീഫിന്റെ നേതൃത്വത്തിലുള്ള പൊലിസ് സംഘം മൂവര്‍ക്കുമെതിരെ ആത്മഹത്യാപ്രേരണ കേസ് കൂടി ചേര്‍ത്തത്.

കെ.പി.സി.സി നേതൃത്വത്തിനു നല്‍കുന്നതിനായി എന്‍.എം വിജയന്‍ എഴുതിയതായി പുറത്തുവന്ന കത്തില്‍ പ്രതിചേര്‍ക്കപ്പെട്ട നാലുപേരുടേയും പേരുകളുണ്ട്. അര്‍ബന്‍ ബാങ്ക് നിയമന അഴിമതിയുമായി ബന്ധപ്പെട്ട സാമ്പത്തിക ഇടപാടുകളില്‍ ഇവര്‍ക്കു പങ്കുണ്ടെന്നും തനിക്ക് എന്തെങ്കിലും സംഭവിച്ചാല്‍ ഉത്തരവാദികള്‍ നാലുപേരുമായിരിക്കുമെന്നും കത്തിലുണ്ട്.

സുല്‍ത്താന്‍ ബത്തേരി സര്‍വിസ് സഹകരണ ബാങ്ക്, അര്‍ബന്‍ ബാങ്ക് എന്നിവിടങ്ങളില്‍ നിയമനം വാഗ്ദാനം ചെയ്ത് പലരില്‍നിന്നും വാങ്ങിയ പണം നേതാക്കള്‍ക്ക് കൈമാറിയതായി വിജയന്റെ കത്തുകളില്‍ സൂചിപ്പിച്ചിരുന്നു.

എന്‍.എം വിജയന്‍ കെ.പി.സി.സിക്ക് എഴുതിയ കത്തും മകന്‍ എഴുതിയ കത്തും സംബന്ധിച്ച് പൊലിസ് ശാസ്ത്രീയ പരിശോധന നടത്തുന്നുണ്ട്. മരണപ്പെട്ട മകന്‍ ജിജേഷിന്റെ മൊബൈല്‍ ഫോണും അന്വേഷണസംഘം പരിശോധിക്കുകയാണ്.