നെടുങ്കണ്ടം: കോടതിയില്‍നിന്നു ഗുമസ്തന്റെ നേതൃത്വത്തില്‍ കടത്തിയ ഫയലുകളുടെ പകര്‍പ്പ് പൊലിസ് സ്‌റ്റേഷനുകളില്‍ നിന്നെടുത്തു നിയമനടപടി പൂര്‍ത്തീകരിക്കാന്‍ ഹൈക്കോടതി നിര്‍ദേശം.
നെടുങ്കണ്ടം കോടതിയില്‍നിന്നു കടത്തിയ 113 കേസുകളുടെ ഫയലുകളുടെ പകര്‍പ്പാണ് പൊലിസ് സ്‌റ്റേഷനുകളില്‍ നിന്ന് എത്തിക്കുക. ഇതു സംബന്ധിച്ചുള്ള നിര്‍ദേശം പൊലിസ് സ്‌റ്റേഷനുകള്‍ക്കു കൈമാറി.
ഫയലുകള്‍ എത്തുന്നതനുസരിച്ച് പ്രതികള്‍ക്കെതിരെയുള്ള നടപടികള്‍ കോടതി ആരംഭിക്കും. കഴിഞ്ഞ ഒരു വര്‍ഷത്തിനിടെയാണ് കോടതിയില്‍ സൂക്ഷിച്ച പെറ്റിക്കേസ് ഫയലുകള്‍ ഗുമസ്തന്‍ കടത്തിയത്. കേസില്‍പ്പെട്ടവരില്‍നിന്ന് ഇതുവഴി രണ്ടു ലക്ഷത്തിലധികം രൂപ തട്ടിയെടുത്തതായാണ് ആരോപണം. തുടര്‍ന്ന്, ആരോപണ വിധേയനായ ഗുമസ്തനെ കോടതിയില്‍നിന്നു പുറത്താക്കിയിരുന്നു.
പെറ്റി കേസുകളിലെ പ്രതികള്‍ കോടതിയില്‍ പിഴയടയ്ക്കുന്നതിനായി എത്തിയപ്പോള്‍ പല തവണകളായി ഇവരില്‍നിന്നു തന്ത്രപരമായി പണം കൈക്കലാക്കി. ഇതിനുശേഷം ഈ കേസുകളുമായി ബന്ധപ്പെട്ട ഫയലുകളും ഗുമസ്തന്‍ കടത്തി. മദ്യപിച്ചു വാഹനമോടിക്കല്‍, രേഖകളില്ലാതെ വാഹനമോടിക്കല്‍ തുടങ്ങിയ കേസുകളുമായി ബന്ധപ്പെട്ട ഫയലുകളാണ് കാണാതായത്.
നിസ്സാര പെറ്റിയില്‍ തീരേണ്ട കേസുകളിലെ പ്രതികളില്‍നിന്നാണ് കോടതിയില്‍ അടയ്ക്കാനെന്ന വ്യാജേന 1000 മുതല്‍ 3000 രൂപ വരെ ഗുമസ്തന്‍ വാങ്ങിയത്. സംഭവത്തെക്കുറിച്ചു നെടുങ്കണ്ടം പൊലിസ് വിശദമായ അന്വേഷണം നടത്തിവരികയാണ്.