അടിമാലി: കേരള പൊലിസ് ഓഫീസേഴ്‌സ് അസോസിയേഷന്‍ ഇടുക്കി ജില്ലാ സമ്മേളന വേദിയില്‍ പൊലിസിനെതിരെ ആഞ്ഞടിച്ച് വൈദ്യുതി വകുപ്പ് മന്ത്രി എം.എം മണി.
കഴിഞ്ഞകാല ജീവിതത്തില്‍ പൊലിസില്‍ നിന്നുണ്ടായ അനുഭവം വിവരിച്ചാണ് മന്ത്രി എം.എം മണി വിമര്‍ശനത്തിന് തുടക്കമിട്ടത്. കഴിഞ്ഞ യു.ഡി.എഫ് സര്‍ക്കാരിന്റെ ഇംഗിതത്തിനുസരിച്ച് നിയമത്തെ മാറ്റിയതിനാലാണ് മുപ്പത് വര്‍ഷം മുമ്പ് നടന്ന സംഭവം കുത്തിയിളക്കി തന്നെ അറസ്റ്റ് ചെയ്തത്. വെറുതെ മന്ത്രിയായ ആളല്ല താന്‍. അടിയന്തിരാവസ്ഥ കാലത്ത് അടിമാലി പൊലിസ് സ്‌റ്റേഷനില്‍ 13 ദിവസം തന്നെ വിലങ്ങ് വച്ച് കെട്ടിയിട്ടിട്ടുണ്ട്. പൊലിസുകാരാല്‍ ഏറ്റവും അധികം വേട്ടയാടപ്പെട്ടിട്ടുള്ള താന്‍തന്നെ കേരള പൊലിസ് ഓഫീസേഴ്‌സ് അസോസിയേഷന്റെ ഇടുക്കി ജില്ലാ സമ്മേളനം ഉദ്ഘാടനം ചെയ്യാനെത്തിയത് നിയോഗമാണെന്ന് എം എം മണി പറഞ്ഞു.
കഴിഞ്ഞകാല പീഡനങ്ങള്‍ക്കുള്ള മറുപടിയായി തിരിച്ചുള്ള നടപടികള്‍ക്ക് പിണറായി സര്‍ക്കാര്‍ മുതിരില്ലെന്നും അദ്ദേഹം വ്യക്തമാക്കി.ദീര്‍ഘകാലത്തെ സേവനത്തിന് ശേഷം പൊലിസ് സേനയില്‍ നിന്നും വിരമിക്കുന്ന ജില്ലയിലെ 12 ഉദ്യോഗസ്ഥര്‍ക്കുള്ള യാത്രയയപ്പും പൊലിസ് മെഡലുകള്‍ കരസ്ഥമാക്കിയ സേനാംഗങ്ങള്‍ക്കുള്ള അനുമോദന സമ്മേളനവും സംഘടിപ്പിച്ചു.നിയമത്തിനും നീതിക്കും വേണ്ടി നിലനില്‍ക്കുമ്പോഴും പൊലിസ് സംവിധാനവുമായി ബന്ധപ്പെട്ട് ബഹുജനങ്ങള്‍ക്കിടിയില്‍ നിലനില്‍ക്കുന്ന അഭിപ്രായ വ്യത്യാസത്തെ തുറന്നവതരിപ്പിക്കുന്നതിനുള്ള വേദിയായി സമ്മേളനം.
പൊതുമനസ്സിലെ പൊലിസ്, മിഥ്യയും യാഥാര്‍ത്ഥ്യവും എന്ന വിഷയത്തെ ആസ്പദമാക്കി സംഘടിപ്പിച്ച ഓപ്പണ്‍ ഫോറത്തിന് വലിയ പൊതുജനപങ്കാളിത്തം ലഭിച്ചു.കേരള പൊലിസ് ഓഫീസേഴ്‌സ് അസോസിയേഷന്‍ ജില്ലാ പ്രസിഡന്റ് എ കെ റഷീദ് അധ്യക്ഷത വഹിച്ച സമ്മേളനത്തില്‍ ജില്ലാ പൊലിസ് മേധാവി കെ ബി വേണുഗോപാല്‍ മുഖ്യപ്രഭാഷണം നടത്തി.അസോസിയേഷന്‍ ഭാരവാഹികളായ കെ ജി പ്രകാശ്, സി ആര്‍ ബിജു, ഇ ജി മനോജ് കുമാര്‍, തൊടുപുഴ ഡിവൈഎസ്പി എ.എന്‍ പ്രസാദ്, അഡ്മിനിസ്‌ട്രേഷന്‍ ഡി.വൈ.എസ്.പി ജില്‍സണ്‍ മാത്യു തുടങ്ങിയവര്‍ പങ്കെടുത്തു.