റിയാദ്: സഊദിയിലെ ദമാമില്‍ അത്യാസന്ന നിലയില്‍ ആശുപത്രിയില്‍ കഴിഞ്ഞിരുന്ന മലയാളി വീട്ടുജോലിക്കാരി മരിച്ചു. ആലപ്പുഴ മുള്ളത് വളപ്പില്‍ ആലിശേരി ചിറയില്‍ നെസി സൈനുദ്ധീനാണ് (55) കഴിഞ്ഞ ദിവസം ആശുപത്രിയില്‍ മരിച്ചത്. ഒന്നരമാസം മുന്‍പ് സഊദിയില്‍ സ്വദേശിയുടെ വീട്ടില്‍ ജോലിക്കെത്തിയ ഇവര്‍ ഏതാനും ദിവസങ്ങളായി അത്യാസന്ന നിലയില്‍ വെന്റിലേറ്ററില്‍ കഴിയുകയായിരുന്നു. രോഗം ഗുരുതരമായതിനാല്‍ നാട്ടിലേക്കയക്കാനോ മറ്റു ചികിത്സകള്‍ നല്‍കാനോ സാധിച്ചിരുന്നില്ല.

കടുത്ത സാമ്പത്തിക ബുദ്ധിമുട്ടിനെ തുടര്‍ന്ന് ജോലിക്കെത്തിയ ഇവരുടെ ആരോഗ്യ സ്ഥിതി സഊദിയില്‍ എത്തിയത് മുതല്‍ ക്ഷീണത്തിലായിരുന്നു. ഓരോ ദിവസം കഴിയുംതോറും കൂടുതല്‍ ക്ഷീണിതയായ ഇവരെ സ്‌പോണ്‍സര്‍ ആശുപത്രിയില്‍ എത്തിക്കുകയായിരുന്നു.

ഫൈസല്‍, അന്‍സില്‍, അഫ്‌സല്‍ എന്നീ മൂന്നു ആണ്‍മക്കാളാണുള്ളത്. മാനസിക വൈകല്യമുള്ള രണ്ടാമത്തെ കുട്ടിയുടെ ചികിത്സക്കു വേണ്ടി പണം കണ്ടെത്തുന്നതിനാണ് ഇവര്‍ സഊദിയിലേക്ക് വന്നത്. മൃതദേഹം ദമാമില്‍ തന്നെ ഖബറടക്കുന്നതിനുള്ള നടപടിക്രമങ്ങള്‍ വരികയാണ്.