തിരുവനന്തപുരം: റേഡിയോ ജോക്കിയും യുവഗായകനുമായ മടവൂര്‍ പടിഞ്ഞാറ്റേല ആശാനിവാസില്‍ രാജേഷ് കുമാറിനെ കൊലപ്പെടുത്തിയ സംഭവത്തിന് വിദേശത്തുള്ള യുവതിയുമായുള്ള ബന്ധം പൊലിസ് സ്ഥിരീകരിച്ചു. രാജേഷുമായി ബന്ധമുണ്ടായിരുന്നുവെന്നു വിദേശത്തുള്ള യുവതി പൊലിസിനോടു സമ്മതിച്ചു. കൊലപാതകം നടക്കുന്ന സമയത്തു ഈ യുവതിയുമായി രാജേഷ് ഫോണില്‍ സംസാരിക്കുകയായിരുന്നെന്നു കണ്ടെത്തിയിരുന്നു. രാജേഷിന്റെ കൊലപാതകം നടത്തിയത് ഖത്തറിലെ വ്യവസായിയുടെ ക്വട്ടേഷനെടുത്ത ഗുണ്ടാസംഘമാണെന്ന് പൊലിസ് നേരത്തെ അറിയിച്ചിരുന്നു. രാജേഷ് ഖത്തറിലായിരുന്ന സമയത്ത് അടുപ്പമുണ്ടായിരുന്ന യുവതിയുടെ ഭര്‍ത്താവാണ് ക്വട്ടേഷന്‍ നല്‍കിയതെന്നാണ് പൊലിസിന്റെ പ്രാഥമിക നിഗമനം. അടുത്തിടെ വിവാഹമോചിതയായ ഈ യുവതിയെ നാട്ടിലെത്തിക്കാനും പൊലിസ് ആലോചിക്കുന്നുണ്ട്. അയല്‍ജില്ലകളിലേക്ക് അന്വേഷണം വ്യാപിപ്പിച്ചിട്ടുണ്ട്. പ്രതികളെക്കുറിച്ച് വ്യക്തമായ സൂചന ലഭിച്ചതായും ഉടന്‍ തന്നെ പിടികൂടുമെന്നും അന്വേഷണ സംഘം വ്യക്തമാക്കി.
ഇതിനിടെ അക്രമി സംഘം സഞ്ചരിച്ചിരുന്ന വാഹനം പൊലിസ് കണ്ടെത്തി. ഇവര്‍ സഞ്ചരിച്ച കാര്‍ വാടകയ്‌ക്കെടുത്തതു കായംകുളം സ്വദേശിയാണെന്ന നിര്‍ണായക മൊഴി പൊലിസിനു ലഭിച്ചതിനെ തുടര്‍ന്നു നടത്തിയ അന്വേഷണത്തിലാണ് കാര്‍ കണ്ടെത്തിയത്. കാര്‍ വാടകയ്ക്കു നല്‍കിയവരാണ് ഇതു സംബന്ധിച്ച മൊഴി നല്‍കിയത്. അടൂരില്‍ ഉപേക്ഷിച്ച നിലയിലാണ് ചുവന്ന സ്വിഫ്റ്റ് കാര്‍ കണ്ടെത്തിയത്. കായംകുളം സ്വദേശിയുടെ ഉടമസ്ഥതയിലുള്ളതാണ് കാര്‍.