തൃക്കരിപ്പൂര്‍: കടല്‍ജീവിയായ നീരാളി വലയില്‍ കുടുങ്ങി. കവ്വായിക്കായലിന്റെ ഭാഗമായ മെട്ടമ്മല്‍ പുഴയില്‍ മത്സ്യബന്ധനത്തിനിടെയാണ് മത്സ്യത്തൊഴിലാളിയായ കൃഷ്ണന്റെ വലയില്‍ നീരാളി കുടുങ്ങിയത്. ഏകദേശം ഒരു കിലോയിലധികം തൂക്കമുണ്ട് നീരാളിക്ക്. ഏതാനും ദിവസങ്ങളായി കവ്വായിക്കായലില്‍ നീരാളിയുടെ സാന്നിധ്യമുണ്ടെന്നു മത്സ്യത്തൊഴിലാളികള്‍ പറയുന്നു. ഏതാനും ദിവസം മുന്‍പ് തൃക്കരിപ്പൂര്‍ക്കടപ്പുറത്ത് രണ്ടു നീരാളിക്കുഞ്ഞുങ്ങള്‍ ചത്തുപൊങ്ങിയിരുന്നു.
കടല്‍ കായലുമായി സംഗമിക്കുന്ന ഭാഗത്തുകൂടി കവ്വായിക്കായലിലേക്കു നീരാളി എത്തിയതാണെന്നു കരുതുന്നു. ഇങ്ങനെ വരുന്ന നീരാളികള്‍ പിന്നീടു കടലിലേക്കു ചെല്ലാനാവാതെ കായലില്‍ തന്നെ കഴിയേണ്ടിവരും. മൊളൂസ്‌ക്ക് വിഭാഗത്തില്‍പ്പെട്ട ഷെല്ലില്ലാത്ത ഏക കടല്‍ജീവിയാണിത്. എട്ടു കൈകളുള്ള ഈ ജലജീവി അത് ഉപയോഗിച്ചാണ് ഇര പിടിക്കുന്നത്. ഒട്ടുന്നതും വരിഞ്ഞു മുറുകുന്നതുമായ എട്ടു കൈകള്‍ക്കുള്ളില്‍ അകപ്പെട്ടാല്‍ പിന്നെ ഇരകള്‍ക്ക് രക്ഷപ്പെടുക പ്രയാസമാണ്. നീരാളി മനുഷ്യശരീരത്തില്‍ പിടികൂടിയാല്‍ ദശയുമായേ പിടിവിടുകുയുള്ളൂ എന്നപ്രചാരണം കാരണം കവ്വായിക്കായലില്‍ തൊഴിലാളികള്‍ മത്സ്യബന്ധനത്തിന് ഇറങ്ങുന്നത് ഭയാശങ്കയോടെയാണ്.