തിരുവനന്തപുരം: കീഴാറ്റൂരില്‍ നെല്‍ വയലിലൂടെതന്നെ ഹൈവേ കൊണ്ടുവരാനുള്ള സര്‍ക്കാര്‍ പിടിവാശി അഴിമതിക്ക് വഴിയൊരുക്കാനാണെന്ന് വയല്‍ക്കിളി സമര നേതാവ് സുരേഷ് കീഴാറ്റൂര്‍ പറഞ്ഞു. പ്രസ് ക്ലബ് ടി.എന്‍.ജി ഹാളില്‍ സി.എം.പി സംഘടിപ്പിച്ച 'കീഴാറ്റൂരും കേരളവും' എന്ന സെമിനാറില്‍ സംസാരിക്കുകയായിരുന്നു അദ്ദേഹം.
വയല്‍ക്കിളികള്‍ വികസനത്തിനെതിരല്ല, പക്ഷേ മണ്ണും കുടിനീരും മറന്നുകൊണ്ടുള്ള വികസനം ആപത്താണ്. വികസനത്തിലുപരി ജീവിക്കാന്‍ ഭൂമിയുണ്ടാകുക എന്നതാണ് പ്രധാനം. വരും തലമുറയെ ഓര്‍ത്തുകൊണ്ടുള്ള വികസനം നടത്താന്‍ സര്‍ക്കാര്‍ തയാറാകണം. കീഴാറ്റൂരിലെ ജനജീവിതം തകര്‍ക്കുന്ന നടപടിയുമായി ഇനിയും മുന്നോട്ട് പോകുകയാണെങ്കില്‍ അതിശക്തമായ സമരം സര്‍ക്കാര്‍ നേരിടേണ്ടിവരും. വേണ്ടിവന്നാല്‍ കീഴാറ്റൂരില്‍ നിന്ന് തിരുവനന്തപുരത്തേക്ക് ലോങ് മാര്‍ച്ച് നടത്താനും വയല്‍ക്കിളികള്‍ തയാറാകുമെന്നും അതിന് ഇടവരുത്താതെ സര്‍ക്കാര്‍ പ്രശ്‌നങ്ങള്‍ രമ്യമായി പരിഹരിക്കണമെന്നും അദ്ദേഹം പറഞ്ഞു. വയല്‍ക്കിളി സമര നേതാവ് മനോഹരനും സെമിനാറില്‍ സംസാരിച്ചു. അന്നവും വെള്ളവുമാണ് പ്രധാനമെന്നും കാറും ബസും ഓടിച്ച് വിശപ്പടക്കാനാവില്ലെന്നും അദ്ദേഹം പറഞ്ഞു. തണ്ണീര്‍ തടങ്ങളും നെല്‍ വയലുകളും നശിപ്പിക്കാതെ ഹൈവേ സാധ്യമാണെന്നിരിക്കേ സര്‍ക്കാര്‍ വയല്‍നികത്താന്‍ പിടിവാശികാണിക്കുന്നതെന്തിനാണെന്നും അദ്ദേഹം ചോദിച്ചു. സെമിനാര്‍ കെ. മുരളീധരന്‍ എം.എല്‍.എ ഉദ്ഘാടനം ചെയ്തു. സെമിനാറില്‍ സി.എം.പി ജനറല്‍ സെക്രട്ടറി സി.പി ജോണ്‍ അധ്യക്ഷനായി.