മുക്കം: സ്വകാര്യ വ്യക്തികള്‍ കൈയേറിയ മുക്കം നഗരസഭയുടെ അധീനതയിലുള്ള പുറമ്പോക്ക് ഭൂമി തിരിച്ചുപിടിക്കുന്നതിന്റെ ഭാഗമായി കോഴിക്കോട് തഹസില്‍ദാര്‍ സ്ഥലത്ത് പരിശോധന നടത്തി.
നഗരസഭാ ചെയര്‍മാന്‍ വി. കുഞ്ഞന്‍ മാസ്റ്റര്‍, കെ.ടി ശ്രീധരന്‍, വി. ലീല, മുക്കം വിജയന്‍ റവന്യു ഉദ്യോഗസ്ഥര്‍ എന്നിവരും തഹസില്‍ദാര്‍ക്കൊപ്പമുണ്ടായിരുന്നു. നഗരസഭയുടെ അന്യാധീനപ്പെട്ട ഭൂമി തിരിച്ചുപിടിക്കാന്‍ നടപടിയാവശ്യപ്പെട്ട് നഗരസഭാധികൃതര്‍ നല്‍കിയ അപേക്ഷയെ തുടര്‍ന്നാണ് സന്ദര്‍ശനമെന്ന് തഹസില്‍ദാര്‍ അനിതാ കുമാരി പറഞ്ഞു. നഗരസഭക്ക് അര്‍ഹതപ്പെട്ട സ്ഥലം തിരിച്ചുപിടിച്ച് ഇരുവഴിഞ്ഞിപ്പുഴയുടെ മനോഹാരിത ഉപയോഗപ്പെടുത്തി തീര്‍ഥാടന ടൂറിസം പദ്ധതിക്ക് നഗരസഭ ആലോചിക്കുന്നതായി ചെയര്‍മാന്‍ വി. കുഞ്ഞന്‍ മാസ്റ്റര്‍ അറിയിച്ചു. സംസ്ഥാന സര്‍ക്കാര്‍ അനുവദിച്ച പൊതുമരാമത്ത് വകുപ്പ് റെസ്റ്റ് ഹൗസ് നിര്‍മിക്കാനും സ്ഥലം ലഭിക്കുമെന്നാണ് പ്രതീക്ഷയെന്നും ചെയര്‍മാന്‍ പറഞ്ഞു.
1996ലെ മുക്കം പഞ്ചായത്തിലെ സര്‍വേ കണക്കുപ്രകാരം ഇരുവഴിഞ്ഞി പുഴയോരത്ത് മുക്കം കടവ് പാലത്തിന് മുകള്‍ഭാഗത്തു മാത്രം 181 ഹെക്ടര്‍ സ്ഥലം പുറമ്പോക്കായി ഉണ്ടന്നാണു കണക്ക്. എന്നാല്‍ കഴിഞ്ഞ ഏതാനും വര്‍ഷങ്ങളായി ഈ പുഴ പുറമ്പോക്ക് സ്ഥലം സ്വകാര്യവ്യക്തികളുടെ കൈവശമാണ്. പഞ്ചായത്തോ റവന്യു വകുപ്പോ കാര്യമായ പരിശോധന നടത്താതെ അന്യാധീനപ്പെട്ട ഭൂമി തിരിച്ചുപിടിക്കാനാണ് നഗരസഭ പദ്ധതി തയ്യാറാക്കിയത്. സര്‍വേ നടപടികള്‍ക്കായി കഴിഞ്ഞ ബജറ്റില്‍ മൂന്നര ലക്ഷം രൂപ നഗരസഭ വകയിരുത്തിയിരുന്നു.