മുക്കം: സാംസ്‌കാരിക സന്നദ്ധ സംഘടനയായ സ്പീക്ക് മാക്കേയുമായി സഹകരിച്ച് മുക്കം നഗരസഭ അവധിക്കാല സൗജന്യ കലാപരിശീലന ക്യാംപ് 'സപര്യ 2018' സംഘടിപ്പിക്കുന്നു.
22 മുതല്‍ 27 വരെ മണാശ്ശേരി ഗവ. യു.പി സ്‌കൂളിലാണ് ക്യാംപ് നടക്കുക. ചുമര്‍ ചിത്രകല, ടെറോകോട്ട, കഥകളി, മോഹിനിയാട്ടം, ഭരതനാട്യം, നങ്ങ്യാര്‍കൂത്ത്, കഥക്, ഒഡിസി, കര്‍ണാടക സംഗീതം, തോല്‍പ്പാവക്കൂത്ത് തുടങ്ങി പത്തോളം ഇനങ്ങളിലാണ് പരിശീലനം നല്‍കുന്നത്.
അതാത് രംഗത്തെ പ്രശസ്തരായ കലാകാരന്‍മാരാണ് ക്ലാസുകള്‍ക്ക് നേതൃത്വം നല്‍കുക. എല്ലാ ദിവസവും ഇത്തരം കലകളുടെ പ്രദര്‍ശനവും നടക്കും. എട്ടു വയസിന് മുകളില്‍ പ്രായമുള്ള വിദ്യാര്‍ഥികള്‍ക്കും മുതിര്‍ന്നവര്‍ക്കും പങ്കെടുക്കാം. 1000 പേര്‍ക്ക് പരിശീലനത്തിനുള്ള സൗകര്യങ്ങളാണ് ഒരുക്കുന്നതെന്ന് ഭാരവാഹികള്‍ അറിയിച്ചു.
പരിപാടിയുടെ നടത്തിപ്പിനായി 101 അംഗ സ്വാഗതസംഘം രൂപീകരിച്ചു. യോഗത്തില്‍ നഗരസഭ ചെയര്‍മാന്‍ വി. കുഞ്ഞന്‍ മാസ്റ്റര്‍ അധ്യക്ഷനായി. സ്റ്റാന്റിങ് കമ്മിറ്റി ചെയര്‍മാന്‍മാരായ കെ.ടി ശ്രീധരന്‍, പി. പ്രശോഭ് കുമാര്‍, എന്‍. ചന്ദ്രന്‍, പ്രധാനാധ്യാപകന്‍ പി. ഗിരീഷ് കുമാര്‍, ബോബി ജോസഫ്, ബാലകൃഷ്ണന്‍ വെണ്ണക്കോട്, ടി.പി രാജീവ്, എ.കെ ഉണ്ണികൃഷ്ണന്‍, ഇ.കെ അബ്ദുല്‍ സലാം സംസാരിച്ചു. ഭാരവാഹികളായി വി. കുഞ്ഞന്‍ മാസ്റ്റര്‍ (ചെയര്‍മാന്‍), എന്‍. ചന്ദ്രന്‍ (വൈസ് ചെയര്‍മാന്‍), പി. ഗിരീഷ് കുമാര്‍ (കണ്‍വീനര്‍), പി.എം മനോമോഹന്‍ (ജോ. കണ്‍വീനര്‍) എന്നിവരെ തെരഞ്ഞെടുത്തു. വിവിധ സബ് കമ്മിറ്റികളും രൂപീകരിച്ചു. പരിശീലനത്തില്‍ പങ്കെടുക്കാന്‍ താല്‍പര്യമുള്ളവര്‍ 9400307817, 8547593545, 94468907656 എന്നീ നമ്പറുകളില്‍ ബന്ധപ്പെടണം.