യെരവാന്‍: ദിവസങ്ങള്‍ നീണ്ട പ്രതിപക്ഷ പ്രക്ഷോഭത്തിനൊടുവില്‍ അര്‍മീനിയന്‍ പ്രധാനമന്ത്രി സെര്‍സി സര്‍ഗിസിയാന്‍ രാജിവച്ചു. തനിക്കെതിരേയുള്ള പ്രക്ഷോഭം അവസാനിപ്പിക്കാന്‍ അര്‍മേനിയന്‍ റിപ്പബ്ലിക്കിലെ മുഴുവന്‍ പൗരന്മാരോടും ആവശ്യപ്പെടുകയാണെന്നും രാജ്യത്തിന്റെ പ്രധാനമന്ത്രി പദവയില്‍ നിന്ന് ഒഴിയുകയാണെന്നും സെര്‍സി പ്രസ്താനവനയില്‍ അറിയിച്ചു. നിക്കോള്‍ പഷ്‌നിയന്‍(പ്രതിപക്ഷ നേതാവ്) ശരിയായ പക്ഷത്തായിരുന്നു. താന്‍ തെറ്റായ ഭാഗത്തായിരുന്നു. തനിക്കെതിരേയുള്ള പ്രക്ഷോഭകരുടെ ആവശ്യം നടപ്പാക്കുകയാണെന്ന് സെര്‍സി സര്‍ഗിസിയാന്‍ പറഞ്ഞു.
അഴിമതിക്കാരനായ പ്രധാനമന്ത്രി രാജ്യത്ത് ഏകാധിപത്യ ഭരണം നടത്താനാണ് ശ്രമിക്കുന്നതെന്ന് ആരോപിച്ചാണ് പ്രക്ഷോഭം. അതിനിടെ ഇന്നലെ പ്രധാനമന്ത്രിക്കെതിരേ നടന്ന പ്രക്ഷോഭത്തിന് പിന്തുണയുമായി നൂറ് കണക്കിന് സൈനികര്‍ രംഗത്തെത്തി.
ക്രമസമാധാനത്തിനായി ചുമതലപ്പെടുത്തിയ സൈനികരാണ് തലസ്ഥാനമായ യെരവാന്‍ ഉള്‍പ്പെടെയുള്ള പ്രദേശങ്ങളില്‍ പ്രക്ഷോഭകര്‍ക്കൊപ്പം അണിനിരന്നതെന്ന് മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ സര്‍ക്കാരിനെതിരേ നടക്കുന്ന പ്രക്ഷോഭത്തില്‍ പങ്കെടുക്കുന്നവര്‍ക്കെതിരേ ശക്തമായ നടപടികളെടുക്കുമെന്ന് പ്രതിരോധ മന്ത്രാലയം പറഞ്ഞു.
പ്രധാനമന്ത്രി രാജിവയ്ക്കണമെന്ന് ആവശ്യപ്പെട്ട് ഏപ്രില്‍13 മുതലാണ് പ്രതിപക്ഷം പ്രക്ഷോഭവുമായി തെരുവിലിറങ്ങിയത്. ഞായറാഴ്ച നടന്ന പ്രതിഷേധത്തില്‍ പ്രതിപക്ഷ നേതാവായ നിക്കോള്‍ പഷിനിയന്‍ ഉള്‍പ്പെടെ മൂന്നുപേരെ പൊലിസ് അറസ്റ്റ് ചെയ്തിരുന്നു.
ക്രമസമാധാന നില തകരാറിലാവുന്ന പ്രവര്‍ത്തനങ്ങള്‍ നടത്തിയതിനാണ് ഇവരെ അറസ്റ്റ് ചെയ്തതെന്ന് സര്‍ക്കാര്‍ പറഞ്ഞു. എന്നാല്‍ അറസ്റ്റ് ചെയ്തവരെ ഇന്നലെ വിട്ടയച്ചു.
പ്രധാനമന്ത്രിക്കെതിരേ ആയിരക്കണക്കിന് പേരാണ് പത്താം ദിവസമായ ഇന്നലെയും തെരുവിലിറങ്ങിയത്. പത്ത് വര്‍ഷം പൂര്‍ത്തിയാക്കിയ പ്രധാനമന്ത്രി ഈ മാസമാണ് വീണ്ടും ഭരണത്തിലേറിയത്. അധികാരം ശക്തിപ്പെടുത്തിക്കൊണ്ടുള്ള നിയമഭേദഗതിക്ക് കഴിഞ്ഞയാഴ്ച അര്‍മേനിയന്‍ പാര്‍ലമെന്റ് അംഗീകാരം നല്‍കിയിരുന്നു.
അധികാരം ഉറപ്പിക്കാനുള്ള സര്‍ഗിസിയാന്റെ ശ്രമത്തിന്റെ ഭാഗമായാണ് ഭേദഗതിയെന്നാണ് പ്രതിപക്ഷ ആരോപണം.