വൈക്കം: ഇന്ത്യയുടെ എല്ലാ മഹത്തായ മൂല്യങ്ങള്‍ക്കുംമേല്‍ ആര്‍.എസ്.എസും ബി.ജെ.പിയും വര്‍ഗീയതയുടെ വിഷം പുരട്ടിയ വാളുയര്‍ത്തുകയാണെന്ന് സി.പി.ഐ ദേശീയ എക്‌സിക്യൂട്ടീവ് അംഗം ബിനോയ് വിശ്വം.
23-ാം പാര്‍ട്ടി കോണ്‍ഗ്രസിന്റെ പതാക ജാഥയ്ക്ക് വൈക്കത്ത് സ്വീകരണത്തില്‍ മറുപടി പ്രസംഗം നടത്തുകയായിരുന്നു അദ്ദേഹം. വംശവിവേചന രാഷ്ട്രീയത്തിന്റെയും കോര്‍പ്പറേറ്റ് ദാസ്യത്തിന്റെയുമാണ് ബി.ജെ.പിയുടെ അജണ്ട. അവര്‍ ഇനിയും ജയിച്ചാല്‍ നമ്മുടെ ജനാധിപത്യവും മതേതരത്വവും സോഷ്യലിസ്റ്റ് സ്വപ്നങ്ങളും മണ്ണടിയും. ഒരിക്കലും ആ ഫാസിസ്റ്റ് വിഷവാള്‍ ഇന്ത്യക്കുമേല്‍ പതിക്കരുതെന്ന് നിര്‍ബന്ധമുള്ള പാര്‍ട്ടിയാണ് സി.പി.ഐ എന്നും അദ്ദേഹം പറഞ്ഞു.
ദലിതര്‍ക്ക് ഇന്ത്യയില്‍ ജീവിക്കാന്‍ അവകാശമില്ലെന്നു കരുതുന്നവരാണ് സംഘ്പരിവാര്‍. ബോട്ട്‌ജെട്ടി മൈതാനിയില്‍ നടന്ന സ്വീകരണ സമ്മേളനത്തില്‍ എന്‍.എം മോഹനന്‍ അധ്യക്ഷനായി.
എ.ഐ.ടി.യു.സി സംസ്ഥാന ജനറല്‍ സെക്രട്ടറി കെ.പി രാജേന്ദ്രന്‍, സംസ്ഥാന സെക്രട്ടറി അഡ്വ. വി.ബി ബിനു, മഹിളാ സംഘം സംസ്ഥാന സെക്രട്ടറി അഡ്വ. പി.വസന്തം, കിസാന്‍സഭ സംസ്ഥാന സെക്രട്ടറി വി.ചാമുണ്ണി, ബി.കെ.എം.യു സംസ്ഥാന ജനറല്‍ സെക്രട്ടറി പി.കെ കൃഷ്ണന്‍, സി.പി.ഐ ജില്ലാ സെക്രട്ടറി സി.കെ ശശിധരന്‍, സി.കെ ആശ എം.എല്‍.എ, സി.പ.ഐ സംസ്ഥാന കൗണ്‍സില്‍ അംഗങ്ങളായ ആര്‍.സുശീലന്‍, അഡ്വ. വി.കെ സന്തോഷ്‌കുമാര്‍, ലീനമ്മ ഉദയകുമാര്‍, ജില്ലാ കൗണ്‍സില്‍ അംഗം ടി.എന്‍ രമേശന്‍, പി.സുഗതന്‍, ജോണ്‍ വി.ജോസഫ്, മണ്ഡലം സെക്രട്ടറി എം.ഡി ബാബുരാജ്, കെ.അജിത്ത് എന്നിവര്‍ പ്രസംഗിച്ചു.