ന്യൂഡല്‍ഹി: ഉത്തരാഖണ്ഡ് ഹൈക്കോടതി ചീഫ് ജസ്റ്റിസ് കെ.എം ജോസഫിനെ സുപ്രിം കോടതി ജഡ്ജിയായി നിയമിക്കുന്നതിനെ എതിര്‍ക്കുന്ന കേന്ദ്ര സര്‍ക്കാര്‍ നടപടിക്കെതിരേ കോണ്‍ഗ്രസ് നേതാവ് പി. ചിദംബംരം.
കെ.എം ജോസഫിന്റെ മതവും സംസ്ഥാനവുമാണോ അദ്ദേഹത്തെ സുപ്രിം കോടതിയിലേക്ക് നിയമിക്കപ്പെടാതിരിക്കാന്‍ കാരണമെന്ന് അദ്ദേഹം ചോദിച്ചു.
സുപ്രിം കോടതി കൊളീജിയം രണ്ട് പേരുകളാണ് നിര്‍ദേശിച്ചത്. ഇതിലൊന്ന് മുതിര്‍ന്ന അഭിഭാഷക ഇന്ദു മല്‍ഹോത്രയും മറ്റൊന്ന് ഉത്തരാഖണ്ഡ് ചീഫ് ജസ്റ്റിസ് കെ.എം ജോസഫുമാണ്. എന്നാല്‍ ഇന്ദു മല്‍ഹോത്രയെ നിയമിക്കാന്‍ മാത്രമാണ് കേന്ദ്ര സര്‍ക്കാര്‍ തയാറായത്. 2016ല്‍ കേന്ദ്ര സര്‍ക്കാരിനെ വിമര്‍ശിച്ചുകൊണ്ട് കെ.എം ജോസഫ് നടത്തിയ ഒരു പ്രസംഗമാണ് അദ്ദേഹത്തെ തഴയാന്‍ കാരണമെന്നും ചിദംബരം ആരോപിച്ചു.
രഹീഷ് റാവത്തിന്റെ നേതൃത്വത്തിലുള്ള മുന്‍ ഉത്തരാഖണ്ഡ് സര്‍ക്കാരിനെ പിരിച്ചുവിടാനുള്ള മോദി സര്‍ക്കാരിന്റെ നീക്കത്തിന് തടയിട്ടതും കെ.എം ജോസഫിനോടുള്ള ശത്രുതക്ക് കാരണമാണെന്നും അദ്ദേഹം കൂട്ടിച്ചേര്‍ത്തു.