കൊച്ചി: ഐ ലീഗ് രണ്ടാം ഡിവിഷനില്‍ കേരള ബ്ലാസ്റ്റേഴ്‌സിന്റെ റിസര്‍വ് ടീമിന് കനത്ത തോല്‍വി. എഫ്.സി കേരള 5-1 ന് ബ്ലാസ്റ്റേഴ്‌സ് റിസര്‍വ് ടീമിനെ പരാജയപ്പെടുത്തി. പനമ്പിള്ളിനഗര്‍ സ്‌പോര്‍ട്‌സ് അക്കാദമി ഗ്രൗണ്ടില്‍ കേരള ഡെര്‍ബി എന്ന വിശേഷണത്തോടെ ഇന്നലെ നടന്ന മത്സരത്തിലാണ് ബ്ലാസ്റ്റേഴ്‌സിനെ എഫ്.സി കേരള വീണ്ടും നാണംകെടുത്തിയത്. തുടര്‍ച്ചയായ വിജയത്തോടെ ഗ്രൂപ്പിലെ ഒന്നാം സ്ഥാനവും എഫ്.സി കേരള നിലനിര്‍ത്തി. ഹോം മത്സരത്തിലും ബ്ലാസ്റ്റേഴ്‌സിനെതിരേ എഫ്.സി കേരള 3-2 ന്റെ വിജയം നേടിയിരുന്നു. എഫ്.സി കേരളക്ക് വേണ്ടി ശ്രേയസ് ഹാട്രിക് നേടി.
എഫ്.സി കേരളയുടെ സമ്പൂര്‍ണാധിപത്യം നിറഞ്ഞു നിന്ന പോരാട്ടത്തില്‍ 18ാം മിനുട്ടില്‍ എം.എസ് ജിതിനിലൂടെ സന്ദര്‍ശകര്‍ മുന്നിലെത്തി. തുടര്‍ന്നായിരുന്നു ശ്രേയസിന്റെ ഹാട്രിക് പ്രകടനം. 36, 49, 56 മിനിട്ടുകളിലായിരുന്നു ശ്രേയസ് ബ്ലാസ്റ്റേഴ്‌സിന്റെ വല കുലുക്കിയത്. 70ാം മിനുട്ടില്‍ ഷൈബര്‍ലോങ് ബ്ലാസ്റ്റേഴ്‌സിന്റെ ആശ്വാസ ഗോള്‍ നേടി. കളിയുടെ അവസാന മിനുട്ടിലെ ഗോളിലൂടെ ഇ.കെ ഹാരിസ് എഫ്.സി കേരളയുടെ ഗോള്‍ പട്ടിക തികച്ചു. ഏഴ് മത്സരങ്ങളില്‍ നിന്ന് എഫ്.സി കേരള 16 പോയിന്റ് നേടി. ഓസോണ്‍ എഫ്.സിയോട് മാത്രമാണ് എഫ്.സി കേരള ഇതുവരെ തോറ്റത്. മൂന്നാം തോല്‍വിയോടെ 12 പോയിന്റുമായി ബ്ലാസ്റ്റേഴ്‌സ് ഗ്രൂപ്പില്‍ മൂന്നാം സ്ഥാനത്താണ്.