റിയാദ്: ജിദ്ദ,മലബാർ മേഖല പ്രവാസികളുടെ ഏറെ കാലത്തെ ആവശ്യത്തിനൊടുവിൽ കരിപ്പൂരിൽ നിന്നും ജിദ്ദയിലേക്ക് എയർ ഇന്ത്യ ജംബോ സർവ്വീസ് അടുത്ത മാസം മുതൽ ആരംഭിക്കും. അടുത്ത മാസം പതിനാറ് മുതൽ ആരംഭിക്കുന്ന ജിദ്ദ- കരിപ്പൂർ ടിക്കറ്റിനു ബുക്കിങ് ആരംഭിച്ചതായി എയർ ഇന്ത്യ അറിയിച്ചു. ജിദ്ദ കരിപ്പൂർ സെക്റ്ററിൽ ആരംഭിക്കുന്ന ജംബോ സർവ്വീസ് ജിദ്ദ മേഖലയിലെ മലബാർ പ്രവാസികൾക്കും വിശുദ്ധ ഭൂമിയിലേക്ക് ഉംറ തീർത്ഥാടനത്തിന് എത്തുന്നവർക്കും ഏറെ ആശ്വാസകരമായിരിക്കും. ഏറെ കാലമായി ഇക്കാര്യം ആവശ്യപ്പെട്ടു മലബാർ നിവാസികൾ കാത്തിരിക്കുകയായിരുന്നു.

        നിലവിൽ തയ്യാറാക്കിയിരിക്കുന്ന സമയക്രമം പ്രകാരം രാത്രി 11.15 നു ജിദ്ദയിൽ നിന്നും പുറപ്പെടുന്ന വിമാനം രാവിലെ 07.05 നു കരിപ്പൂരിൽ എത്തും. തിരിച്ചു വൈകിട്ട് 5.30 നു പുറപ്പെട്ടു 9.15ന് ജിദ്ദയിൽ എത്തും. 45 കിലോ ലഗേജാണ് എയർ ഇന്ത്യ ഓരോ ഓരോ യാത്രക്കാരനും അനുവദിക്കുക. 2019 ഫെബ്രുവരിയിലാണ് കരിപ്പൂര്‍- ജിദ്ദ സര്‍വീസ് തുടങ്ങുമെന്ന് എയര്‍ ഇന്ത്യ വിമാനത്താവള അധികൃതരെ അറിയിച്ചത്. തുടർന്ന്, ബി 747-400 ജെംബോ വിമാനത്തിന് ഡി.ജി.സി.എ കഴിഞ്ഞ ജൂലൈയിൽ അനുമതി നൽകിയിരുന്നു. എന്നാല്‍ സ്ഥിരം ജംബോ സര്‍വ്വീസുകള്‍ക്കുള്ള അനുമതി റണ്‍വേ നവീകരണത്തിന്റെ പേരില്‍ വൈകുകയായിരുന്നു. ണ്‍വേയുടെ നീളം 6,000 അടിയില്‍ നിന്നും 9,000 അടിയാക്കി നവീകരിച്ച ശേഷവും സ്ഥിര പറക്കലിനുള്ള അനുമതി വൈകുകയായിരുന്നു.

        നിലവില്‍ പ്രവാസികള്‍ക്ക് കണ്ണൂരോ, നെടുമ്പാശ്ശേരിയിലോ വിമാനം ഇറങ്ങേണ്ട സ്ഥിതിയാണുള്ളത്. ഇത് പ്രവാസികള്‍ക്ക് ഏറെ ബുദ്ധിമുട്ടുണ്ടാക്കുന്നതായി വ്യാപകമായ പരാതിയും ഉയര്‍ന്നിരുന്നു. ജംബോ വിമാനങ്ങള്‍ക്ക് അനുമതി ലഭിച്ചതിലൂടെ പ്രവാസികളുടെ യാത്രാ ദുരിതത്തിന് വിരാമമായിരിക്കുന്നത്. 2015 ഏപ്രിൽ മുപ്പതിനാണ് റൺവേ നവീകനത്തിന്റെ പേരിൽ കരിപ്പൂരിൽ നിന്നും വലിയ വിമാനങ്ങൾ പിൻവലിച്ചിരുന്നത്.