തിരുവനന്തപുരം: സംസ്ഥാനത്തെ സ്വാശ്രയകോളജുകള്‍ ഉള്‍പ്പെടെയുള്ള സ്ഥാപനങ്ങളില്‍ ബി.എസ്.സി. നഴ്‌സിങ്, ബി.ഫാം, ഫാം ഡി കോഴ്‌സുകളില്‍ പ്രവേശനത്തിന് 2017-18 അധ്യയന വര്‍ഷം മുതല്‍ കൗണ്‍സലിങ് നടത്താന്‍ പ്രവേശന പരീക്ഷാ കമ്മിഷണര്‍ക്ക് സര്‍ക്കാര്‍ നിര്‍ദേശം നല്‍കി.
ബി.എസ്.സി. നഴ്‌സിങ് പ്രവേശനം കര്‍ശനമായും യോഗ്യതാ പരീക്ഷയില്‍ (പ്ലസ ടു,സി.ബി.എസ്.ഇ, ഐ.സി.എസ്.ഇ) ലഭിച്ച മാര്‍ക്കിന്റെ അടിസ്ഥാനത്തിലായിരിക്കണം. കേരള എന്‍ജിനീയറിങ് പ്രവേശന പരീക്ഷയുടെ റാങ്ക് ലിസ്റ്റില്‍ നിന്ന് ഒന്നാം പേപ്പറിനു ലഭിച്ച മാര്‍ക്കിനെ (ഫിസിക്‌സ്, കെമിസ്ട്രി വിഷയങ്ങളുടെ ഇന്‍ഡക്‌സ് മാര്‍ക്ക്) അടിസ്ഥാനമാക്കി ബി.ഫാം, ഫാം ഡി കോഴ്‌സുകള്‍ക്ക് പ്രത്യേക റാങ്ക് ലിസ്റ്റ് തയാറാക്കണമെന്നും നിര്‍ദേശിച്ചിട്ടുണ്ട്.