കൊല്ലം: അനധികൃത പണമിടപാടുകാരെ കുടുക്കി ഓപ്പറേഷന്‍ ഷൈലോക്കുമായി കൊല്ലം പൊലിസ് രംഗത്ത്. അനധികൃത പണമിടപാടുകാരെ പിടികൂടുന്ന ഓപ്പറേഷന്‍ ഷൈലോക്കിന്റെ ഭാഗമായി കൊല്ലം സിറ്റിപൊലിസിന്റെ പരിശോധനയില്‍ നിരവധി കള്ളപ്പണക്കാര്‍ കുടുങ്ങി. സിറ്റി പരിധിയിലെ തെരഞ്ഞെടുക്കപ്പെട്ട നൂറു വീടുകളില്‍ ഇന്നലെ നടന്ന പരിശോധനയില്‍ കോടികള്‍ പൊലിസ് പിടിച്ചെടുത്തു. നിരവധി വീടുകളില്‍ നിന്നും കണക്കില്‍പ്പെടാത്ത സ്വര്‍ണ്ണവും മുദ്രപത്രങ്ങളും പ്രമാണങ്ങളും പിടിച്ചെടുത്തു.
കുലശേഖരപുരം ആദിനാട് തെക്ക് ശ്യാം രാജു നിവാസില്‍ രാജുവിന്റെ വീട്ടില്‍ നിന്നും 54.17 ലക്ഷം രൂപ പിടിച്ചെടുത്തു. ഇയാള്‍ക്ക് ഒരു ലേല ചിട്ടി മാത്രം നടത്താനുള്ള ലൈസന്‍സേ ഉള്ളൂയെന്നും ഇതിന്റെ മറവില്‍ ധാരാളം പണമിടപാടുകള്‍ നടത്തിവരികയായിരുന്നുവെന്നും പൊലിസ് പറഞ്ഞു. തൊടിയൂര്‍ പുലിയൂര്‍ വഞ്ചി തെക്ക് സോപാനം വീട്ടില്‍ മോഹനന്റെ പക്കല്‍ നിന്നും 15.5 ലക്ഷം രൂപയും ഒരുകിലോ സ്വര്‍ണവും പിടിച്ചെടുത്തു. പാവുമ്പ മണപ്പള്ളി തെക്ക് രഞ്ജിത്ത് ഭവനത്തില്‍ പൊടിയനില്‍ നിന്നും 15.5 ലക്ഷം രൂപയും കുലശേഖരപുരം കടത്തുര്‍ വേണാട്ട് (മാളുമായ) ഭവനത്തില്‍ മഹാരാജന്റെ വീട്ടില്‍ നിന്നുമായി 4,37000 രൂപയും പിടികൂടി.
പള്ളിത്തോട്ടം,കൊല്ലം വെസ്റ്റ് പൊലിസ് പരിധിയില്‍ നിന്നും പ്രോമിസറി നോട്ടുകളും ചെക്കുകളും കണ്ടെടുത്തു. ഓപ്പറേഷന്‍ കുബേര പാളിയതോടെ ഒരിടവേളയ്ക്കുശേഷം കൊള്ളപ്പലിശക്കാര്‍ വീണ്ടും കൊല്ലത്തു തലപൊക്കിയിരുന്നു. പൊലിസ് നിരീക്ഷണത്തിലുണ്ടായിരുന്നവരെക്കുറിച്ച് കൃത്യമായ ആസൂത്രണവും മുന്നൊരുക്കവും നടത്തിയാണ് അപ്രതീക്ഷിതമായി പുലര്‍ച്ചെ അഞ്ചുമുതല്‍ പരിശോധന തുടങ്ങിയത്. എ.സി.പിമാര്‍ മുതല്‍ താഴോട്ട് സബ് ഇന്‍സ്‌പെക്ടര്‍മാര്‍വരെയുള്ളവരെ മുഴുവന്‍ രംഗത്തിറക്കിയായിരുന്നു പരിശോധന. പരിശോധനാ സംഘത്തിന് നിശ്ചയിച്ചിട്ടുള്ള വീടുകളെക്കുറിച്ചുള്ള ലൊക്കേഷന്‍ പ്രതിപാദിക്കുന്ന ഇമെയിലുകള്‍ നല്‍കിയതോടെ,ഉദ്യോഗസ്ഥരുടെ ഫോണുകളും നിശ്ചലമായി.
പരിശോധന നടത്തേണ്ട വീടുകളുടെ പട്ടിക ഉദ്യോഗസ്ഥര്‍ തനിയെ തീരുമാനിച്ചു ഇഷ്ടക്കാരെ സഹായിക്കുന്ന പതിവ് രീതിയാണ് സിറ്റിപൊലിസ് കമ്മിഷണര്‍ ഡോ. സതീഷ് ബിനോ മാറ്റിയെഴുതിയത്.
എ.സി.പി ശിവപ്രസാദ്, സി.ഐ.അനില്‍കുമാര്‍, എസ്.ഐ.രാജേഷ്, തെക്കുംഭാഗം എസ്.ഐ.രാജീവ്,എ.എസ്.ഐമാരായ നൂര്‍മുഹമ്മദ്, സെയ്ദ്, പ്രസന്നന്‍, അജിത്ത് ലാല്‍ തുടങ്ങിയവര്‍ പങ്കെടുത്തു.