കിംബെര്‍ലി: അണ്ട@ര്‍ 19 ക്രിക്കറ്റ് ലോകകപ്പിനു അട്ടിമറിയോടെ തുടക്കം. ഉദ്ഘാടന മത്സരത്തില്‍ ആതിഥേയരായ ദക്ഷിണാഫ്രിക്കയെ അഫ്ഗാനിസ്താന്‍ തരിപ്പണമാക്കി. ഗ്രൂപ്പ് ഡിയില്‍ നടന്ന ഏകപക്ഷീയമായ മത്സരത്തില്‍ ഏഴു വിക്കറ്റിനാണ് അഫ്ഗാന്‍ ദക്ഷിണാഫ്രിക്കയെ തകര്‍ത്തത്. 

ബൗളിങ് കരുത്തിലാണ് അഫ്ഗാന്‍ മികച്ച ജയം കൊയ്തത്. ആദ്യം ബാറ്റ് ചെയ്ത ദക്ഷിണാഫ്രിക്കയെ അഫ്ഗാന്‍ ഉജ്ജ്വല ബൗളിങിലൂടെ വരിഞ്ഞുകെട്ടി. 29.1 ഓവര്‍ മാത്രമേ ദക്ഷിണാഫ്രിക്കക്ക് ബാറ്റ് ചെയ്യാന്‍ കഴിഞ്ഞുള്ളു. 129 റണ്‍സിന് ദക്ഷിണാഫ്രിക്കയെ അഫ്ഗാന്‍ എറിഞ്ഞൊതുക്കുകയായിരുന്നു. ആതിഥേയ നിരയില്‍ രണ്ട@ക്കം കടന്നത് മൂന്നു പേര്‍ മാത്രമാണ്. ക്യാപ്റ്റന്‍ ബ്രൈസ് പാര്‍സണ്‍സ് (40), വാലറ്റത്ത് ജെറാള്‍ഡ് കോട്‌സെ (38), ല്യൂക്ക് ബ്യുഫോര്‍ട്ട് (25) എന്നിവരുടെ ചെറുത്തുനില്‍പ്പ് ഇല്ലായിരുന്നെങ്കില്‍ ദക്ഷിണാഫ്രിക്ക ഇതിനേക്കാള്‍ വലിയ നാണക്കേട് ഏറ്റുവാങ്ങുകയായിരുന്നു. ലെഗ് സ്പിന്നര്‍ ഷഫീഖുള്ള ഗഫാരിയുടെ മികച്ച ബൗളിങ് പ്രകടനമാണ് ദക്ഷിണാഫ്രിക്കയുടെ നട്ടെല്ലൊടിച്ചത്. 9.1 ഓവറില്‍ ര@ണ്ടു മെയ്ഡനുള്‍പ്പെടെ 15 റണ്‍സ് മാത്രം വഴങ്ങിയ താരം ആറു വിക്കറ്റുകളാണ് കൊയ്തത്. 

ദക്ഷിണാഫ്രിക്ക ര@ണ്ടിന് 59 റണ്‍സെന്ന ഭേദപ്പെട്ട സ്‌കോറില്‍ നില്‍ക്കെ കളിയുടെ 12ാം ഓവറിലാണ് ഗഫാരി ബൗള്‍ ചെയ്യാനെത്തിയത്. പിന്നീട് ഗഫാരിയുടെ വണ്‍മാന്‍ ഷോയായിരുന്നു ഗ്രൗണ്ടില്‍. 130 റണ്‍സിന്റെ വിജയലക്ഷ്യം തേടിയിറങ്ങിയ അഫ്ഗാന്‍ 25 ഓവറില്‍ മൂന്നു വിക്കറ്റ് നഷ്ടത്തില്‍ വിജയം കൈക്കലാക്കി. ഇമ്രാന്‍ മിര്‍ (57), ഓപ്പണര്‍ ഇബ്രാഹിം സദ്രാന്‍ (52) എന്നിവരുടെ അര്‍ധ സെഞ്ചുറികളാണ് അഫ്ഗാന്റെ ജയം അനായാസമാക്കിയത്.