സുല്‍ത്താന്‍ ബത്തേരി: വനഗ്രാമമായ ചെട്ട്യാലത്തൂരില്‍ വന്യമൃഗ ശല്യം രൂക്ഷമാകുന്നു. സ്വയം സന്നദ്ധ പുനരധിവാസത്തിലൂടെ ഈ ഗ്രാമത്തിലുള്ള 231 കുടുംബങ്ങളില്‍ 72 കുടുംബങ്ങള്‍ വനത്തിനു പുറത്തേക്ക് മാറിതാമസിച്ചു. ആദ്യഘട്ട തുക കൈപ്പറ്റിയവരില്‍ ഏഴു പേര്‍ മാത്രമാണ് ഇവിടെ താമസം തുടരുന്നത്. വീടുകള്‍ പൊളിച്ചുമാറ്റി സ്ഥലം കൈമാറാന്‍ ഇവര്‍ക്ക് വനം വകുപ്പ് നോട്ടീസ് നല്‍കിയിട്ടുണ്ട്. പുനരധിവാസത്തിലൂടെ പല കുടുംബങ്ങളും വനത്തിനു പുറത്തു കടന്നപ്പോള്‍ ഈ പ്രദേശം വന്യമൃഗങ്ങളുടെ താവളമായി മാറി.
പകലും രാത്രിയും ഒരു പോലെ ആനയടക്കമുള്ള വന്യമൃഗങ്ങളെ പ്രദേശത്ത് കാണാം. ഇവിടെ നിലവില്‍ താമസിക്കുന്നവര്‍ക്ക് പുറത്തിറങ്ങാന്‍ പറ്റാത്ത സ്ഥിതിയാണ്. ആദിവാസി കുടുംബങ്ങള്‍ക്ക് തൊഴിലിനു വേണ്ടി പുറത്തു പോകാന്‍ പറ്റാത്ത അവസ്ഥയാണ്. തങ്ങളെ എത്രയും പെട്ടെന്ന് വനത്തിനു പുറത്തെത്തിക്കണമെന്നാണ് ഈ കുടുംബങ്ങള്‍ ആവശ്യപ്പെടുന്നത്. കാട്ടുനായ്ക്ക വിഭാഗത്തില്‍പ്പെട്ട ആദിവാസി കുടുംബങ്ങള്‍ വനത്തിനു പുറത്തു പോകാന്‍ ആഗ്രഹിച്ചിരുന്നില്ല. ഇവര്‍ വനം വകുപ്പിന് അപേക്ഷയും സമര്‍പ്പിച്ചിട്ടില്ല. വന്യമൃഗശല്യം രൂക്ഷമായതോടെ ഇപ്പോള്‍ ഇവരും വനത്തിനു പുറത്തു കടക്കാന്‍ ആഗ്രഹിക്കുന്നുണ്ട്.