ന്യൂഡല്‍ഹി: ഷഹീന്‍ബാഗ് പോലുള്ള സംഭവങ്ങള്‍ അവസാനിപ്പിക്കാന്‍ ബി.ജെ.പി സ്ഥാനാര്‍ത്ഥിക്ക് വോട്ടു ചെയ്യൂ എന്ന അമിത് ഷായുടെ പരാമര്‍ശത്തിനെതിരെ രൂക്ഷ വിമര്‍ശനവുമായി കോണ്‍ഗ്രസ് നേതാവ് പി. ചിദംബരം. ഗാന്ധിജിയെ വെറുക്കുന്നവര്‍ക്കാ മാത്രമേ ഷഹീന്‍ ബാഗില്ലാത്ത ഇന്ത്യയെ കുറിച്ച് സംസാരിക്കാനാവൂ- അദ്ദേഹം ചൂണ്ടിക്കാട്ടി.

'ഷഹീന്‍ബാഗ് മുക്ത ഡല്‍ഹിക്കായാണ് ആഭ്യന്തര മന്ത്രി വോട്ടു ചോദിക്കുന്നത്. ഗാന്ധിജിയെ വെറുക്കുന്നവര്‍ക്കു മാത്രമേ ഷഹീന്‍ബാഗ് ഇല്ലാത്ത ഡല്‍ഹിക്കായി ആവശ്യപ്പെടാന്‍ കഴിയൂ. ഗാന്ധിജിയുടെ സാരാംശമാണ് ഷഹീന്‍ബാഗ്'- അദ്ദേഹം ട്വീറ്റ് ചെയ്തു.

അഹിംസയില്‍ നിന്നും സത്യഗ്രഹത്തില്‍ നിന്നുമുള്ള മുക്തിയാണ് ഷഹീന്‍ബാഗ് മുക്തം എന്നതു കൊണ്ട് അര്‍ത്ഥമാക്കുന്നത്- അദ്ദേഹം ചൂണ്ടിക്കാട്ടി.

'മലിനീകരണമുക്ത ഡല്‍ഹിയാണ് ഞങ്ങള്‍ക്കാവശ്യം. എല്ലാ വീടുകളിലും ശുദ്ധജലം, 24 മണിക്കൂറും വൈദ്യുതി, മികച്ച വിദ്യാഭ്യാസ സംവിധാനം, ചേരികളോ അനധികൃത കോളനികളോ ഉണ്ടാകില്ല, മികച്ച ഗതാഗത സൗകര്യം, ഗതാഗതക്കുരുക്കുകളില്ലാത്ത ലോകോത്തര നിലവാരമുള്ള റോഡുകള്‍, ഷഹീന്‍ ബാഗ് എന്നൊന്നുണ്ടാകില്ല... അങ്ങനെയൊരു ഡല്‍ഹിയാണ് ഞങ്ങള്‍ക്ക് വേണ്ടത'്. ഇതായിരുന്നു അമിത്ഷായുടെ പരാമര്‍ശം. ബിജെപി സോഷ്യല്‍ മീഡിയ വോളന്റിയര്‍മാര്‍ സംഘടിപ്പിച്ച ചടങ്ങില്‍ സംസാരിക്കവെയായിരുന്നു അദ്ദേഹത്തിന്റെ പരാമര്‍ശം.

പൗരത്വ നിയമ ഭേദഗതിക്കെതിരായ പ്രതിഷേധങ്ങളുടെ മുഖ്യവേദിയാണ് രാജ്യതലസ്ഥാനത്തെ ഷഹീന്‍ ബാഗ്.