നിലമ്പൂര്‍: സര്‍ക്കാര്‍ നിര്‍ദേശം മറികടന്ന് ദേശീയ ജനസംഖ്യാ രജിസ്റ്റര്‍ (എന്‍.പി.ആര്‍) വിവര ശേഖരണത്തിന് ജീവനക്കാരെ ആവശ്യപ്പെട്ട് വിവിധ സ്‌കൂള്‍ പ്രഥമാധ്യാപകര്‍ക്ക് നിലമ്പൂര്‍ തഹസില്‍ദാറും കത്തയച്ചു. എന്നാല്‍ കലക്ടര്‍ ഇടപെട്ടതിനെ തുടര്‍ന്ന് കത്തു പിന്‍വലിച്ചു.
മഞ്ചേരിയിലെ വിവാദ നടപടിക്കു പിന്നാലെ നിലമ്പൂര്‍ താലൂക്കിലെ തിരുവാലി, പുള്ളിപ്പാടം വില്ലേജുകളിലെ സ്‌കൂളിലേക്കാണ് തഹസില്‍ദാര്‍ കത്തയച്ചത്.
തഹസില്‍ദാര്‍ ഒപ്പിട്ട കത്തില്‍ എന്‍.പി.ആര്‍ പരാമര്‍ശമില്ലെങ്കിലും ഇതോടൊപ്പം നല്‍കിയ സംസ്ഥാന സെന്‍സെസ് ഓപറേഷന്‍ ഡയറക്ടറുടെ ഉത്തരവിന്റെ പകര്‍പ്പിലാണ് എന്‍.പി.ആര്‍ പരാമര്‍ശിക്കുന്നത്. ഇതു വെട്ടുകയോ തിരുത്തുകയോ ചെയ്യാതെയാണ് സ്‌കൂളുകളിലേക്ക് നല്‍കിയത്.
അതാത് വില്ലേജ് ഓഫിസര്‍മാരാണ് സ്‌കൂള്‍ പ്രഥമാധ്യാപകര്‍ക്ക് തഹസില്‍ദാറുടെ സര്‍ക്കുലര്‍ എത്തിച്ചത്. എന്‍.പി.ആര്‍ വിവരശേഖരണത്തിനും തുടര്‍നടപടികള്‍ക്കും ഉദ്യോഗസ്ഥരെ നിയമിക്കുന്നതിന്റെ ഭാഗമായി ജീവനക്കാരുടെ വിവരങ്ങള്‍ അറിയിക്കണമെന്നാണ് സര്‍ക്കുലറില്‍ ആവശ്യപ്പെടുന്നത്.
എന്നാല്‍ ഇതുമായി ബന്ധപ്പെട്ട് കലക്ടര്‍ തഹസില്‍ദാറോട് വിശദീകരണം ആവശ്യപ്പെട്ടു. ഇന്നലെ തഹസില്‍ദാര്‍മാരെ കലക്ടറേറ്റിലേക്ക് വിളിപ്പിക്കുകയും എന്‍.പി.ആര്‍ സംബന്ധിച്ച നയം അറിയിക്കുകയും ചെയ്തു. സെന്‍സസ് ഡെപ്യൂട്ടി ഡയറക്ടര്‍ അയച്ചു തന്ന സര്‍ക്കുലര്‍ അതേപടി സ്‌കൂള്‍ പ്രഥമാധ്യാപകര്‍ക്ക് കൈമാറുക മാത്രമാണ് ചെയ്തതെന്ന് നിലമ്പൂര്‍ തഹസില്‍ദാര്‍ സുഭാഷ് ചന്ദ്രബോസ് പറഞ്ഞു.