തിരൂര്‍: ആഴക്കടല്‍ മത്സ്യബന്ധനത്തിന് മത്സ്യത്തൊഴിലാളികളെ തെരഞ്ഞെടുത്ത് പരിശീലനം നല്‍കി സുരക്ഷാ ചുമതല നല്‍കുമെന്ന് മന്ത്രി ജെ. മേഴ്‌സിക്കുട്ടിയമ്മ. പ്രകൃതിക്ഷോഭത്തില്‍ വള്ളവും വലയും നഷ്ടപ്പെട്ട ജില്ലയിലെ മത്സ്യത്തൊഴിലാളികള്‍ക്ക് മുഖ്യമന്ത്രിയുടെ ദുരിതാശ്വാസ നിധിയില്‍ നിന്നുള്ള ധനസഹായ തുക കൈമാറുന്ന താനൂര്‍ ഉണ്യാലിലെ ചടങ്ങില്‍ സംസാരിക്കുകയായിരുന്നു മന്ത്രി.
ഓരോ ഗ്രാമങ്ങളില്‍ നിന്നും 15 വീതം മത്സ്യത്തൊഴിലാളികളെ ഇതിനായി തെരഞ്ഞെടുക്കും. പരപ്പനങ്ങാടിയില്‍ 131 കോടി രൂപ ചെലവില്‍ ഹാര്‍ബര്‍ പ്രവൃത്തി ഈ വര്‍ഷം തന്നെ തുടങ്ങും. ഉണ്യാലില്‍ മത്സ്യത്തൊഴിലാളി കുടുംബങ്ങളിലെ യുവതി യുവാക്കള്‍ക്കും കായിക താരങ്ങള്‍ക്കുമായി സ്റ്റേഡിയം യാഥാര്‍ഥ്യമാക്കാന്‍ അടിയന്തര നടപടി സ്വീകരിക്കും.
പൊതുസമ്മേളനം സ്പീക്കര്‍ പി. ശ്രീരാമകൃഷ്ണന്‍ ഉദ്ഘാടനം ചെയ്തു. മത്സ്യത്തൊഴിലാളികള്‍ക്ക് നഷ്ടപരിഹാരം നല്‍കാന്‍ കാര്യക്ഷമമായ സ്ഥിരം സംവിധാനം വേണമെന്ന് അദ്ദേഹം പറഞ്ഞു. കേരള ചരിത്രത്തിലാദ്യമായാണ് പ്രകൃതിദുരന്തത്തില്‍ നഷ്ടം സംഭവിച്ച മത്സ്യത്തൊഴിലാളികള്‍ക്ക് ഒന്നാകെ ഇത്രയും ധനസഹായ തുക അനുവദിക്കുന്നതെന്നും സ്പീക്കര്‍ പറഞ്ഞു. ജില്ലയിലെ 39 മത്സ്യബന്ധന വള്ളങ്ങള്‍ക്കാണ് രണ്ട് കോടി മുപ്പത് ലക്ഷത്തി നാല്‍പ്പത്തിഅയ്യായിരത്തി എഴുപത്തിയഞ്ച് രൂപയുടെ ധനസഹായം അനുവദിച്ചത്. വി. അബ്ദുറഹ്മാന്‍ എം.എല്‍.എ അധ്യക്ഷനായി. സംസ്ഥാന മത്സ്യത്തൊഴിലാളി കടാശ്വാസ കമ്മിഷന്‍ അംഗം കൂട്ടായി ബഷീര്‍, മത്സ്യത്തൊഴിലാളി ക്ഷേമനിധി ബോര്‍ഡ് ചെയര്‍മാന്‍ സി.പി കുഞ്ഞിരാമന്‍, നിറമരുതൂര്‍ പഞ്ചായത്ത് പ്രസിഡന്റ് സുഹ്‌റ റസാഖ്, വൈസ് പ്രസിഡന്റ് കെ.വി സിദ്ദീഖ്, സ്ഥിരംസമിതി ചെയര്‍മാന്‍ പി.പി സൈതലവി, മത്സ്യഫെഡ് ഡയറക്ടര്‍ കെ.കെ സതീഷ്‌കുമാര്‍ സംസാരിച്ചു.