തിരുവനന്തപുരം: ആര്‍.എസ്.എസ്സിനെതിരെ പരിഹാസ ശരവുമായി മുഖ്യമന്ത്രി പിണറായി വിജയന്‍. ആര്‍.എസ്.എസ് ഭീഷണി വിലപ്പോവില്ല. ഒരു സ്ഥലത്തും കാലു കുത്താന്‍ അനുവദിക്കില്ലെന്നത് വെറും ഗീര്‍വാണം മാത്രമാണ്. കാലില്ലാത്തയാള്‍ ചവിട്ടുമെന്ന് പറയുന്നത് പോലെയാണതെന്നും അദ്ദേഹം പറഞ്ഞു.
ഇന്ത്യയില്‍ ഒരിടത്തും പിണറായി വിജയനെ കാലുകുത്താന്‍ അനുവദിക്കില്ലെന്ന് കഴിഞ്ഞ ദിവസം ബി.ജെ.പി നേതാവ് ഗോപാലകൃഷ്ണന്‍ പറഞ്ഞിരുന്നു.
പ്രതിപക്ഷത്തിനെതിരെയും അദ്ദേഹം വിമര്‍ശനം തൊടുത്തു വിട്ടു. കോണ്‍ഗ്രസ് ആര്‍.എസ്.എസുമായി സമരസപ്പെടാന്‍ ശ്രമിക്കുകയാണെന്നും പിണറായി കുറ്റപ്പെടുത്തി. സുധീരനും കുമ്മനവും ഒരേ വാചകമാണ് മുന്നോട്ട് വെക്കുന്നത്. അര്‍.എസ്.എസിനെ വിമര്‍ശിക്കുന്ന ചോദ്യങ്ങളില്‍ നിന്ന് ഒഴിഞ്ഞു നില്‍ക്കാനായിരിക്കും പ്രതിപക്ഷം ഇറങ്ങിപ്പോയതെന്നും അദ്ദേഹം ആരോപിച്ചു. ബാര്‍കോഴക്കസുമായി ബന്ധപ്പെട്ട ചോദ്യവും വരാനുണ്ട്. അയ്യോ തൊടാന്‍ പറ്റില്ലേ എന്ന നിലയില്‍ ഇറങ്ങിപ്പോയതാണ് പ്രതിപക്ഷമെന്ന് അദ്ദേഹം പരിഹസിച്ചു.