മനാമ: സമസ്ത കേരള സുന്നി ജമാഅത്ത് ബഹ്‌റൈന്‍ കേന്ദ്ര കമ്മറ്റിയുടെ കീഴില്‍ ബഹു ജനങ്ങള്‍ക്കായി സംഘടിപ്പിച്ചു വരുന്ന മനാമയിലെ പ്രതിദിന ഇഫ്താര്‍ സംഗമങ്ങള്‍ ജനപങ്കാളിത്തം കൊണ്ട് ശ്രദ്ധേയമാകുന്നു. മനാമ സൂഖിലും പരിസര പ്രദേശങ്ങളിലുമുള്ള വിശ്വാസികള്‍ക്ക് ഏറെ അനുഗ്രഹവും ആശ്വാസവുമായി മാറുന്ന ബഹ്‌റൈന്‍ തലസ്ഥാന നഗരിയിലെ ഈ ഇഫ്താര്‍ സംഗമം റമസാന്‍ 30 ദിവസവും തുടരുമെന്നതും ഇതില്‍ ആര്‍ക്കും പങ്കെടുക്കാമെന്നതും സമസ്തയുടെ ഇഫ്താറിനെ വേറിട്ടതാക്കുന്നു.

കഴിഞ്ഞ ഏതാനും വര്‍ഷങ്ങളായി ഒരു പ്രചരണവുമില്ലാതെ മനാമ കേന്ദ്രീകരിച്ചു നടന്നുവരുന്ന ഈ പ്രതിദിന ഇഫ്താര്‍ സംഗമം ഈ വര്‍ഷം മുതല്‍ മനാമ ഗോള്‍ഡ് സിറ്റിയുടെ ഒന്നാം നിലയില്‍ പ്രവര്‍ത്തിക്കുന്ന സമസ്തയുടെ പുതിയ ഓഫീസ് ആസ്ഥാനത്തെ മദ്‌റസാ ഹാളിലാണ് നടക്കുന്നത്. റമളാന്‍ ആരംഭിച്ചതു മുതല്‍ എല്ലാ ദിവസവും ഇവിടെ നോമ്പുതുറക്കായി എത്തുന്ന എല്ലാവര്‍ക്കും ആവശ്യമായ ഭക്ഷണം ഇവിടെ സജ്ജീകരിക്കപ്പെടുന്നുണ്ടെന്നതും ഈ ഇഫ്താറിന്റെ സവിശേഷതയാണ്.

കേവലം ഒരു ഇഫ്താര്‍ ചടങ്ങ് എന്നതിനപ്പുറം വിശ്വാസികള്‍ക്ക് ആത്മീയാനുഭൂതി പകരുന്ന ഉദ്‌ബോധന പ്രഭാഷണവും തുടര്‍ന്നുള്ള സമൂഹ പ്രാര്‍ത്ഥനകളും സമസ്തയുടെ ഇഫ്താറിനെ വേറിട്ടതാക്കുന്നു. കൂടാതെ, പ്രാര്‍ത്ഥനക്ക് ഏറെ പ്രാധാന്യമുള്ള ഇഫ്താര്‍ സമയത്തുള്ള സമൂഹ പ്രാര്‍ത്ഥനക്കും പ്രഭാഷണങ്ങള്‍ക്കും സമസ്ത പ്രസിഡന്റ് കൂടിയായ സയ്യിദ് ഫക്‌റുദ്ധീന്‍ തങ്ങളാണ് മിക്ക ദിവസവും നേതൃത്വം നല്‍കി വരുന്നത്.

ഫക്‌റുദ്ധീന്‍ തങ്ങളെ കൂടാതെ സമസ്ത ബഹ്‌റൈന്‍ കേന്ദ്ര ഭാരവാഹികളും മദ്‌റസാ അദ്ധ്യാപകരും പണ്ഡിതന്മാരും നേതാക്കളുമടങ്ങുന്ന ഒരു നിരയുടെ സാന്നിധ്യവും ഇഫ്താര്‍ ചടങ്ങിനെ സമ്പന്നമാക്കുന്നുണ്ട്. പ്രതിദിനം വന്‍ സാമ്പത്തിക ചിലവ് പ്രതീക്ഷിക്കുന്ന ഈ ഇഫ്താറിന്റെ ചിലവുകള്‍ വഹിക്കുന്നതും ഉദാരമതികളായ വിശ്വാസികളും പ്രവാസികളായ ചില കച്ചവട സ്ഥാപനങ്ങളുടെ ഉടമകളുമാണ്.

സമസ്ത പ്രസിഡന്റ് സയ്യിദ് ഫഖ്‌റുദ്ധീന്‍ തങ്ങള്‍, സെക്രട്ടറി എസ്.എം അബ്ദുല്‍ വാഹിദ്, ട്രഷറര്‍ വി.കെ കുഞ്ഞഹമ്മദ് ഹാജി എന്നിവരുടെയും മദ്‌റസാ അധ്യാപകരുടെയും നേതൃത്വത്തിലാണ് പ്രതിദിനം ഇഫ്താര്‍ ഒരുക്കങ്ങള്‍ ഇവിടെ നടന്നുവരുന്നത്. കൂടാതെ ഇഫ്താറിനോടനുബന്ധിച്ച് വിഭവങ്ങള്‍ സജ്ജീകരിക്കാനും ഭക്ഷണം വിതരണം ചെയ്യാനും എസ്.കെ.എസ്.എസ്.എഫ് വിഖായയുടെ നേതൃത്വത്തിലുള്ള വിപുലമായ ഒരു വളണ്ടിയര്‍ ടീമും ഇവിടെ പ്രവര്‍ത്തിക്കുന്നുണ്ട്.

എല്ലാദിവസവും നോമ്പു തുറക്കു ശേഷം ഇവിടെ തന്നെ മഗ്‌രിബ് നമസ്‌കാരത്തിനുള്ള സൗകര്യവും സമസ്ത ഒരുക്കിയിട്ടുണ്ട്. അതോടൊപ്പം ദിവസവും രാത്രി എട്ടു മണിയോടെ സ്ത്രീകള്‍ക്ക് മാത്രമായി സമൂഹ തറാവീഹ് നിസ്‌കാരവും ഇവിടെ നടന്നു വരുന്നുണ്ട്. ഇതിന് നേതൃത്വം നല്‍കുന്നത് സ്ത്രീകള്‍ തന്നെയാണ് എന്നതിനാല്‍ നിരവധി സഹോദരിമാരാണ് ഈ സൗകര്യം ഓരോ ദിവസവും ഉപയോഗപ്പെടുത്തി വരുന്നത്.

കൂടാതെ തൊട്ടടുത്തള്ള സമസ്ത പള്ളി എന്നറിയപ്പെടുന്ന മസ്ജിദ് കേന്ദ്രീകരിച്ച് ദിവസവും രാത്രി 10 മണിക്ക് പുരുഷന്മാര്‍ക്കായി തറാവീഹ് സൗകര്യവും ഏര്‍പ്പെടുത്തിയിട്ടുണ്ട്. സമസ്ത മദ്‌റസാ മുഅല്ലിം കൂടിയായ ഉസ്താദ് ഹാഫിള് ശറഫുദ്ധീന്‍ മുസ്ലിയാര്‍ നേതൃത്വം നല്‍കുന്ന ഈ നമസ്‌കാരത്തിന് പള്ളി നിറഞ്ഞൊഴുകിയാണ് വിശ്വാസികള്‍ സംബന്ധിച്ചു വരുന്നത്.

പ്രതിദിന ഇഫ്താര്‍ സംഗമങ്ങള്‍ക്കു പുറമെ എല്ലാ വ്യാഴാഴ്ച രാത്രിയിലും സ്വലാത്ത് മജ്‌ലിസ്, മതപഠന ക്ലാസ്സുകള്‍, വിവിധ ജീവകാരുണ്ണ്യ- സേവന പ്രവര്‍ത്തനങ്ങള്‍ എന്നിവയും നടന്നു വരുന്നുണ്ട്.

 പ്രതിദിന ഇഫ്താര്‍ സംഗമത്തില്‍ പങ്കെടുക്കാനെത്തുന്ന വിശ്വാസികള്‍