സ്വന്തം ലേഖകന്‍
തിരുവനന്തപുരം: നിയമസഭ കാര്യോപദേശക സമിതിയുടെ റിപ്പോര്‍ട്ട് സമര്‍പ്പിക്കുന്നതിനു മുമ്പ് സമിതി യോഗതീരുമാനങ്ങള്‍ മാധ്യമങ്ങളെ അറിയിച്ച നടപടി നിര്‍ഭാഗ്യകരവും സഭയുടെ അന്തസിനു നിരക്കാത്തതുമെന്ന് സ്പീക്കര്‍ പി. ശ്രീരാമകൃഷ്ണന്റെ റൂളിങ്. ഇതു സഭയുടെ അവകാശലംഘനത്തിന്റെ പേരില്‍ നടപടിയെടുക്കാന്‍ പര്യാപ്തമായതാണ്. ഇത്തരം പ്രശ്‌നങ്ങളെന്നും ഭാവിയില്‍ ഒരു കാരണവശാലും ഇതാവര്‍ത്തിക്കരുതെന്നും സ്പീക്കര്‍ പറഞ്ഞു.
പ്രതിപക്ഷനേതാവ് രമേശ് ചെന്നിത്തല കാര്യോപദേശക സമിതി യോഗത്തിനു ശേഷം വാര്‍ത്താസമ്മേളനം വിളിച്ചുചേര്‍ത്ത് സമിതി തീരുമാനങ്ങള്‍ പുറത്തുപറഞ്ഞത് വന്‍ വിവാദമായിരുന്നു. ഇതുസംബന്ധിച്ച മറുപടിക്കായി മാധ്യമപ്രവര്‍ത്തകര്‍ നിയമ മന്ത്രി എ.കെ ബാലനെ സമീപിക്കുകയും ചെയ്തു. മന്ത്രി ബാലന്റെ നടപടിക്കെതിരേ റൂളിങുണ്ടാകണമെന്ന് ആവശ്യപ്പെട്ട് മുസ്്‌ലിം ലീഗ് അംഗം എം. ഉമ്മര്‍ കഴിഞ്ഞ ദിവസം ക്രമപ്രശ്‌നം ഉന്നയിച്ചിരുന്നു. വിഡിയോ ക്ലിപ്പിങുകള്‍ പരിശോധിച്ചതില്‍ കാര്യോപദേശക സമിതി യോഗ തീരുമാനങ്ങളെപ്പറ്റി മന്ത്രി പരാമര്‍ശം നടത്തിയിട്ടില്ലെന്ന് ബോധ്യപ്പെട്ടെന്ന് സ്പീക്കര്‍ പറഞ്ഞു.
എന്നാല്‍ മാധ്യമങ്ങള്‍ നമ്മിലേക്ക് കിനിഞ്ഞിറങ്ങുകയും നമ്മള്‍ മാധ്യമങ്ങളാല്‍ വളഞ്ഞുവയ്ക്കപ്പെടുകയും ചെയ്യുന്ന കാലത്താണ് നമ്മളുള്ളതെന്ന് എല്ലാവരും ജാഗ്രതയോടെ കാണണമെന്നും സ്പീക്കര്‍ മുന്നറിയിപ്പു നല്‍കി.
മന്ത്രി ബാലന്‍ കാര്യോപദേശകസമിതി തീരുമാനം മാധ്യമങ്ങളോട് വെളിപ്പെടുത്തിയെന്ന തെറ്റിദ്ധാരണയുടെ അടിസ്ഥാനത്തിലാണെന്നു തോന്നുന്നു പ്രതിപക്ഷനേതാവ് മീഡിയറൂമില്‍ വാര്‍ത്താസമ്മേളനം നടത്തിയതും കാര്യോപദേശകസമിതിയിലെ ചര്‍ച്ചയുടെ വിശദാംശം വിശദീകരിച്ചതുമെന്ന് സ്പീക്കര്‍ ചൂണ്ടിക്കാട്ടി. കൂടാതെ ഗവര്‍ണറെ തിരിച്ചുവിളിക്കണമെന്ന പ്രമേയം നിരാകരിച്ചതിനു പിന്നില്‍ എന്ന തലക്കെട്ടില്‍ പ്രസിദ്ധീകരിച്ച ലേഖനത്തിലും സമിതി തീരുമാനവും ചര്‍ച്ചയും സംബന്ധിച്ച വ്യക്തമായ പരാമര്‍ശങ്ങളുള്‍പ്പെടുത്തി.
നിയമസഭാസമിതികളുടെ കാര്യത്തില്‍ പൊതുവായും കാര്യോപദേശകസമിതിയുടെ കാര്യത്തില്‍ പ്രത്യേകമായും രഹസ്യസ്വഭാവം നഷ്ടപ്പെടുത്തിയതും അതുവഴി സഭയുടെയും സമിതികളുടെയും പ്രത്യേകാവകാശം ലംഘിച്ചതും സംബന്ധിച്ച് കാര്യമായ പരാതികളൊന്നും കഴിഞ്ഞ കാലങ്ങളിലുണ്ടായിട്ടില്ല.
അതിനാല്‍ അക്കാര്യത്തില്‍ പ്രത്യേക റൂളിങുകളുമുണ്ടായതായി തോന്നുന്നില്ല. മാധ്യമ സ്വാതന്ത്ര്യം പ്രധാനമാണെങ്കിലും സഭയുടെ അവകാശങ്ങളും അധികാരവും അതുപോലെ തന്നെ പ്രധാനമാണ്.
സഭ അംഗീകരിച്ചിട്ടില്ലാത്ത കാര്യോപദേശകസമിതിയുടെ റിപ്പോര്‍ട്ട് മാധ്യമ ചര്‍ച്ചയ്ക്ക് വിധേയമാകുന്ന തരത്തില്‍ അവസരമായി മാറിയത് അത്യന്തം നിര്‍ഭാഗ്യകരമാണെന്ന് സ്പീക്കര്‍ പറഞ്ഞു.