വിഴിഞ്ഞം: വി.ഐ.പി പട്രോളിങിന് ഇറങ്ങിയ തീരദേശപൊലിസ് ബോട്ട് അര്‍ധരാത്രി കടലില്‍ പണിമുടക്കി. എങ്ങോട്ടെന്നില്ലാതെ ഒഴുകിയ ബോട്ടിനെയും പൊലിസുകാരെയും മറൈന്‍ എന്‍ഫോഴ്‌സ്‌മെന്റ് എത്തി രക്ഷിച്ച് കരക്കെത്തിച്ചു.
വെട്ടവും വെളിച്ചവുമില്ലാത്ത ബോട്ടില്‍ രാത്രിയില്‍ ടോര്‍ച്ചിന്റെ വെളിച്ചത്തില്‍ പട്രോളിങിന് പോയ തീരദേശ പൊലിസ് സംഘമാണ് കടലില്‍ കുടുങ്ങിയത്. എന്‍ജിന്‍
നിലച്ച് ശക്തമായതിരയടിയില്‍ ആടിയുലഞ്ഞ ബോട്ട് നിയന്ത്രണം തെറ്റിയ ഒഴുകിയതോടെ ബോട്ടില്‍ ഉണ്ടായിരുന്ന പൊലിസുകാര്‍ ഉള്‍പ്പെട്ട അഞ്ച് പേരും രക്ഷക്കായി മറൈന്‍ എന്‍ഫോഴ്‌സ്‌മെന്റിന്റെ സഹായം തേടി. വിഴിഞ്ഞത്തെ പട്രോള്‍ ബോട്ട് കേടായതിനെ തുടര്‍ന്ന് പൂവാര്‍ തീരദേശ പൊലിസിന്റെ ബോട്ട് കടം വാങ്ങി കടലില്‍ ഇറങ്ങിയ വിഴിഞ്ഞത്തെ തീരദേശപൊലിസുകാരണ് രാത്രിയില്‍ ഏറെ
നേരംവെള്ളം കുടിച്ചത്.
ഹെഡ് ലൈറ്റോ, വൈപ്പറോ, മറ്റ് സംവിധാനങ്ങളോ ഇല്ലാത്ത പഴഞ്ചന്‍ബോട്ടില്‍ ചൊവ്വാഴ്ച രാവിലെ മുതല്‍ പ്രധാന മന്ത്രി വന്നതുമായി ബന്ധപ്പെട്ട വി.ഐ.പി പട്രോളിങിന് എസ്.ഐ ഉള്‍പ്പെട്ട സംഘം രംഗത്തുണ്ടായിരുന്നു.വൈകിട്ടായതോടെ ടോര്‍ച്ചിന്റെ പ്രകാശത്തില്‍ പട്രോളിങ്
ബോട്ടിനെ സന്ധ്യയോടെ വിഴിഞ്ഞത്ത് അടുപ്പിച്ചു. രാത്രി ഒന്‍പത് മണിയോടെ അടിമലത്തുറ കടലില്‍ ഒരാളുടെ മൃതദേഹം ഒഴുകി നടക്കുന്നതായ മത്സ്യത്തൊഴിലാളികള്‍ സ്റ്റേഷനില്‍ വിളിച്ചറിയിച്ചതിനെ തുടര്‍ന്ന് പുറപ്പെട്ട സംഘമാണ് കൂരിരുട്ടില്‍ എന്‍ജിന്‍ തകരാറിനെ തുടര്‍ന്ന് കടലില്‍
കുടുങ്ങിയത്.
ബോട്ട് എങ്ങോട്ടെന്നില്ലാതെ ഒഴുകുന്നതിനിടെ അപ്രതീക്ഷിതമായി ശക്തമായ തിരയടിയും തുടങ്ങിയതോടെ ജീവനക്കാര്‍ ഭീതിയിലായി. തുടര്‍ന്ന് മറൈന്‍ എന്‍ഫോഴ്‌സ്‌മെന്റിനെ സഹായത്തിന് വിളിച്ചു. രാത്രി രക്ഷാപ്രവര്‍ത്തനത്തിനിറങ്ങിയ മറൈന്‍ എന്‍ഫോഴ്‌സിന്റെ ബോട്ടെത്തി പൊലിസുകാരെയും ബോട്ടിനെയും കരക്കെത്തിച്ചു. നിരവധി തവണ അപകടത്തില്‍പ്പെട്ട തീരദേശ പൊലിസിന്റെ ബോട്ടുകളെ ചെറിയ അറ്റകുറ്റപ്പണികള്‍ നടത്തി കടലില്‍ ഇറക്കുന്നതാണ് പ്രശ്‌നങ്ങള്‍ക്ക് കാരണമെന്ന് ഉദ്യോഗസ്ഥര്‍ പറയുന്നു.
ഇതു സംബന്ധിച്ച് ഉന്നത ഉദ്യോഗസ്ഥര്‍ക്ക് നിരവധി തവണ പരാതികളും നിവേദനങ്ങളും നല്‍കിയെങ്കിലും പരിഹാരം ഉണ്ടായിട്ടില്ല. ഇതോടെ ജീവന്‍ കൈയില്‍ പിടിച്ച് പട്രോളിങിനിറങ്ങേണ്ട ഗതികേടിലാണ് ഉദ്യോഗസ്ഥര്‍.