ഫറോക്ക്: മണ്ണൂരില്‍ പൂച്ചേരിക്കുന്ന് ക്ഷേത്രത്തിന് സമീപത്തെ പുളിക്കല്‍ സുരേഷിന്റെ വീട്ടില്‍ മോഷണം. വീട്ടില്‍ നിര്‍ത്തിയിട്ടിരുന്ന ബൈക്കും മൂന്ന് എ.ടി.എം കാര്‍ഡുകളും 2000 രൂപയും മോഷ്ടാവ് കവര്‍ന്നു. ഇതിലെ ഒരു കാര്‍ഡില്‍ നിന്നും രാത്രി 3.30ന് പണം പിന്‍വലിച്ചതായി ഉടമസ്ഥന് മെസേജ് വന്നിട്ടുണ്ട്. പൂച്ചേരിക്കുന്ന് പുളിക്കല്‍ ശ്രീസുബ്രഹ്മണ്യ ക്ഷേത്രത്തിലും പാറക്കടവ് അരയന്‍തോട്ടത്തില്‍ ക്ഷേത്രത്തിലും മോഷണ ശ്രമ നടന്നിട്ടുണ്ട്. ഇന്നലെ അര്‍ധരാത്രിയോടെയാണ് കവര്‍ച്ച നടന്നതെന്ന് കരുതുന്നു. പൂച്ചേരിക്കുന്ന് ക്ഷേത്രത്തിന്റെ ഓഫിസില്‍ കയറിയ കള്ളന്‍ ലോക്കറുകള്‍ തകര്‍ത്തെങ്കിലും ഒന്നും നഷ്ടപ്പെട്ടിട്ടില്ല. ഓഫിസിലുണ്ടായിരുന്നു ഭണ്ഡാരപ്പെട്ടിയും കുത്തിതുറന്നിട്ടുണ്ട്. പാറക്കടവ് അരയന്‍തോട്ടത്തില്‍ ക്ഷേത്രത്തിലെ ഭണ്ഡാരപ്പെട്ടി കുത്തിതുറന്നെങ്കിലും പണം നഷ്ടപ്പെട്ടിടില്ല.
ഫറോക്ക് എസ്.ഐ എം.കെ അനില്‍കുമാറിന്റെ നേതൃത്വത്തില്‍ പൊലിസും വിരലടയാള വിദഗ്ധരും സ്ഥലത്തെത്തി തെളിവുകള്‍ ശേഖരിച്ചു. കടലുണ്ടി ഗ്രാമപഞ്ചായത്ത് പ്രസിഡന്റ് സി.കെ അജയകുമാര്‍, വാര്‍ഡ് മെംബര്‍ എന്‍. ഭാസ്‌കരന്‍ എന്നിവര്‍ സ്ഥലം സന്ദര്‍ശിച്ചു.