മാനന്തവാടി: തുടര്‍ച്ചയായുള്ള വിലയിടിവും തൊഴിലാളിക്ഷാമവും കാരണം ചെറുകിട തേയില കര്‍ഷകര്‍ കൃഷി ഉപേക്ഷിക്കുന്നു. ഇതിനോടകം നിരവധി കര്‍ഷകരാണ് തേയിലച്ചെടികള്‍ വെട്ടിമാറ്റി മറ്റു കൃഷികളിലേക്ക് തിരിഞ്ഞിരിക്കുന്നത്.
 ടീ ബോര്‍ഡിന്റെ അടക്കം സര്‍ക്കാര്‍ സഹായങ്ങള്‍ ഒന്നും കര്‍ഷകര്‍ക്ക് ലഭിക്കാത്തതാണ് കര്‍ഷകരെ ദുരിതത്തിലാക്കിയത്.
വന്‍കിട തോട്ടങ്ങളുടെ ചുവട് പിടിച്ച് 1980 മുതലാണ് ജില്ലയില്‍ കര്‍ഷകരും തേയിലച്ചെടികള്‍ വച്ചുപിടിപ്പിച്ചത്. അക്കാലങ്ങളില്‍ തേയിലക്ക് നല്ല വില ലഭിച്ചിരുന്നെങ്കിലും 2000ന് ശേഷം വില കാര്യമായി കുറഞ്ഞു.
വിയറ്റ്‌നാം ഉള്‍പ്പെടെയുള്ള രാജ്യങ്ങളില്‍ നിന്നുള്ള തേയില ഇറക്കുമതിയാണ് ഈ വിലയിടിവിന് കാരണമായത്.
നിലവില്‍ 10 രൂപക്ക് താഴെ മാത്രമാണ് നുള്ളിയെടുക്കുന്ന ഇലയ്ക്ക് ലഭിക്കുന്നത്. തൊഴിലാളികളുടെ കൂലി വര്‍ധനയും ചെറുകിട കര്‍ഷകരെ പ്രതിസന്ധിയിലാക്കുന്നുണ്ട്.
3000 ത്തോളം ചെറുകിട കര്‍ഷകരാണ് ജില്ലയിലുള്ളത്. ചായപ്പൊടിക്ക് മാര്‍ക്കറ്റില്‍ 150 രൂപ മുതല്‍ 200 രൂപ വരെ വിലയുണ്ടങ്കിലും കര്‍ഷകര്‍ക്ക് ഒന്നും ലഭിക്കാത്തതിന് സമമാണ്.
പലപ്പോഴും ജില്ലയിലുള്ള ഒന്നോ രണ്ടോ ഫാക്ടറികളാണ് കൊളുന്തിന്റെ വില നിശ്ചയിക്കുന്നത്. ഫാക്‌റികള്‍ക്ക് കൊളുന്ത് കൊടുത്ത് അതിന്റെ വി ല ലഭിക്കുന്നതിന് പലപ്പോഴും കര്‍ഷകര്‍ മാസങ്ങളോളം കാത്ത് നില്‍ക്കേണ്ട അവസ്ഥയാണെന്ന് തവിഞ്ഞാല്‍ പഞ്ചായത്തിലെ കൊളങ്ങോട് വര്‍ഷങ്ങളായി തേയിലകൃഷി നടത്തിവന്നിരുന്ന കര്‍ഷകനായ മുരളി പറയുന്നു.തേയില കര്‍ഷകരെ സംരക്ഷിക്കാന്‍ ടീ ബോര്‍ഡ് വിവിധ പദ്ധതികള്‍ നടപ്പിലാക്കുന്നുണ്ടെങ്കിലും ഇതൊന്നും കര്‍ഷകര്‍ക്ക് ഉപകാരപ്പെടുന്നില്ല. വന്‍കിട തോട്ടങ്ങള്‍ മാത്രമാണ് ഇനി അനൂകൂല്യങ്ങള്‍ അധികവും പറ്റുന്നതെന്നും കര്‍ഷകര്‍ ആരോപിക്കുന്നു. താങ്ങുവില പ്രഖ്യാപിച്ചാലും ഈ വില ചെറുകിട കര്‍ഷകര്‍ക്ക് ലഭിക്കുന്നില്ലെന്നും ആക്ഷേപമുണ്ട്.