കോഴിക്കോട്: സംസ്ഥാനത്തെ ആദ്യ മൂന്നംഗ വഖ്ഫ് ട്രൈബ്യൂണലാണ് മന്ത്രി കെ.ടി ജലീല്‍ ഉദ്ഘാടനം ചെയ്തത്. എരഞ്ഞിപ്പാലം ഹൗസ്‌ഫെഡ് കെട്ടിടത്തിലാണ് മൂന്നംഗ കേരള വഖ്ഫ് ട്രൈബ്യൂണലിന്റെ ആസ്ഥാനം. 2013ല്‍ വഖ്ഫ് ആക്ടില്‍ പാര്‍ലമെന്റ് വരുത്തിയ ഭേദഗതിയുടെ ഭാഗമായാണ് കോഴിക്കോട് കേന്ദ്രീകരിച്ച് വഖ്ഫ് ട്രൈബ്യൂണല്‍ ആരംഭിക്കുന്നത്. ഇവിടെ പ്രവര്‍ത്തനം ആരംഭിക്കുന്നതോടെ 1995ലെ വഖ്ഫ് നിയമപ്രകാരം രൂപീകൃതമായ എറണാകുളം, കൊല്ലം, കോഴിക്കോട് എന്നിവിടങ്ങളിലെ ഏകാംഗ ട്രൈബ്യൂണലുകളുടെ പ്രവര്‍ത്തനം അവസാനിപ്പിക്കും.

ഇനി മുതല്‍ കേരളത്തിലെ വഖ്ഫ് സംബന്ധമായ മുഴുവന്‍ തര്‍ക്കങ്ങളും കോഴിക്കോട് അഡിഷനല്‍ ജില്ലാ ജഡ്ജ് കെ. സോമന്‍, ധനകാര്യ വകുപ്പ് അണ്ടര്‍ സെക്രട്ടറി എ.സി ഉബൈദുല്ല, അഡ്വ.ടി.കെ ഹസന്‍ എന്നിവരടങ്ങിയ മൂന്നംഗ ട്രൈബ്യൂണലാണ് കൈകാര്യം ചെയ്യുക.

അതിനിടെ വഖ്ഫ് ട്രൈബ്യൂണല്‍ അംഗങ്ങളുടെ നിയമനത്തില്‍ നീതി പാലിക്കാത്തതില്‍ പ്രതിഷേധിച്ച് സമസ്തയുടെ നേതൃത്വത്തില്‍ നടത്താനിരുന്ന പ്രതിഷേധ പരിപാടി കഴിഞ്ഞ ദിവസം മന്ത്രിയുമായി നടത്തിയ ചര്‍ച്ചയെ തുടര്‍ന്ന് മാറ്റിവച്ചിരുന്നു. ഇക്കാര്യത്തില്‍ പരിഹാരമുണ്ടാക്കുമെന്ന് മന്ത്രി സമസ്ത നേതാക്കളുമായി നടത്തിയ ചര്‍ച്ചയിലാണ് ഉറപ്പുനല്‍കിയത്. ഇതേത്തുടര്‍ന്നാണ് ഇന്നലെ കോഴിക്കോട്ട് സമസ്തയുടെ കീഴിലുള്ള മഹല്ലുകളുടെ മുതവല്ലിമാര്‍ നടത്താനിരുന്ന ധര്‍ണ മാറ്റിവച്ചത്.