ചെന്നൈ: വയലില്‍ മലമൂത്ര വിസര്‍ജ്ജനം നടത്തിയ ദലിത് യുവാവിനെ അടിച്ചു കൊന്നു. ചെന്നൈ വില്ലുപുരത്താണ് സംഭവം. വില്ലുപുരത്ത് ഒരു പെട്രോള്‍ പമ്പില്‍ ജോലി ചെയ്യുന്ന ശക്തിവേല്‍ ആണ് കൊല്ലപ്പെട്ടത്.

ജോലിക്ക് പോവുന്നതിനിടെയാണ് ശക്തിവേല്‍ കൊല്ലപ്പെട്ടത്. യുവാവിനെ വലില്‍ കണ്ട ഒരു സ്ത്രീ ബഹളം വെച്ച് ആളെ കൂട്ടുകയായിരുന്നു. തന്നോട് ശക്തിവേല്‍ മോശമായി പെരുമാറിയെന്ന് യുവതി ആരോപിച്ചു. ഇതോടെ ആളുകള്‍ കൂട്ടം ചേര്‍ന്ന് യുവാവിനെ അടിക്കാന്‍ തുടങ്ങി. ഓടി രക്ഷപ്പെടാന്‍ ശ്രമിച്ചെങ്കിലും നടന്നില്ല.

ആളുകള്‍ ശക്തിവേലിനെ കയ്യും കാലും കെട്ടിയിട്ട് മര്‍ദ്ദിക്കാന്‍ തുടങ്ങി. സംഭവമറിഞ്ഞ് സ്ഥലത്തെത്തിയ പൊലിസ് ഇയാളെ ആശുപത്രിയിലെത്തിക്കാന്‍ തയ്യാറായില്ല., മാത്രമല്ല ഇയാളോട് അടുത്ത ദിവസം അന്വേഷണത്തിന് ഹാജരാവാന്‍ ആവശ്യപ്പെടുകയാണ് ചെയ്തത്. പിന്നീട് സഹോദരി വന്ന് യുവാവിനെ കൂട്ടിക്കൊണ്ടുപോയി. വീട്ടിലെത്തി അല്‍പ സമയം കഴിഞ്ഞപ്പോഴേക്ക് ശക്തിവേല്‍ ബോധരഹിതനാവുകയും മരിക്കുകയുമായിരുന്നു.

സംഭവത്തിന്റെ വീഡിയോ സോഷ്യല്‍ മീഡിയയില്‍ വൈറലായതോടെ പൊലിസ് ഏഴു പേരെ അറസ്റ്റ് ചെയ്തിട്ടുണ്ട്.